न्यापीताव : म्यानमारच्या लोकशाहीवादी नेत्या आँग सान स्यू की यांना येथील विशेष न्यायालयाने चार वर्षांच्या तुरुंगवासाची शिक्षा ठोठावली आहे. कोरोना नियमांचा भंग आणि जमावाला चिथावणी देणे, असे आरोप त्यांच्यावर ठेवण्यात आले होते.

म्यानमारमध्ये लोकशाही मार्गाने निवडून आलेल्या सरकारच्या ताब्यातून या वर्षी फेब्रुवारीमध्ये लष्कराने सत्ता हिसकावून घेतली. तेव्हापासून नोबेल पुरस्कार विजेत्या स्यू की (वय ७६) आणि इतर नेते अटकेत आहेत. लष्करी सत्तेने स्यू की यांच्यावर इतरही अनेक आरोप ठेवले असून त्याबाबतही खटले सुरु आहेत.

लष्कराने सत्ता ताब्यात घेतल्यावर स्यू की यांनी त्यांच्या फेसबुक पेजवरून जनतेला विरोध करण्याचे आवाहन केले होते. तसेच, गेल्या वर्षी नोव्हेंबरमध्ये झालेल्या निवडणुकीवेळी स्यू की यांनी प्रचार करताना कोरोना नियमांचा भंग केल्याचाही त्यांच्यावर आरोप होता. या निवडणुकीत स्यू की यांच्या पक्षाचा मोठा विजय झाला होता. निवडणुकीत गैरप्रकार झाल्याचा आरोप करतच लष्कराने सत्ता काबीज केली. मात्र, असा कोणताही गैरप्रकार झाला नसल्याचे आंतरराष्ट्रीय निरीक्षकांचे म्हणणे आहे. पुढील आठवड्यातही यापैकी एका खटल्याचा निकाल अपेक्षित आहे.