Mexico Village A Mysterious Place : जगात अशा अनेक रहस्यमयी गोष्टी आहेत, ज्या ऐकून आपण आश्चर्य चकीत होतो. त्यातील चित्रविचित्रता कळल्यावर काय बोलावे हेदेखील सुचत नाही. बऱ्याचदा त्यावर विश्वास ठेवणेही कठीण होते. अशाच एका रहस्यमयी गावाविषयी आम्ही तुम्हाला सांगणार आहोत. या गावातले फक्त माणसंच नाही तर पशू-पक्षीपण आंधळे आहेत. नक्की काय आहे हा प्रकार जाणून घेऊया.

याला जगातलं सगळ्यात रहस्यमयी गावदेखील म्हणता येईल. इथे प्रत्येक जीव आंधळा आहे. म्हणूनच याला आंधळ्याचे गाव म्हणूनही ओळखले जाते. याच विचित्र कारणामुळे हे गाव प्रसिद्ध आहे. हे जाणून विचित्र वाटत असले तरी इथली कहाणी चकीत करणारी आहे.

मेक्सिकोमधल्या या गावाचं नाव टिल्टेपक आहे. इथे राहणारा प्रत्येक माणूस आणि जनावर पूर्णपणे आंधळा आहे. त्यांना काहीही दिसत नाही. जेव्हा इथे एखादं मुल जन्म घेतं तेव्हा ते सामान्य असतं. त्याचे डोळे व्यवस्थित असतात. पण हळू हळू तो आंधळा होऊ लागतो.

इथे राहणाऱ्या लोकांचं म्हणणं आहे की, एका शापित झाडामुळे ते सर्व आंधळे आहेत. त्यांचं म्हणणं आहे की, इथे लवजुएला नावाचं एक झाड आहे. जे बघितल्याने माणूसच नव्हे तर पशू-पक्षीही आंधळे होतात. गावात हे झाड अनेक वर्षांपासून आहे. लोकांचं म्हणणं आहे ते झाड बघून ते आंधळे होतात.

पण तज्ज्ञांच मत आहे की, हे गाव जिथे आहे तिथे काही विषारी माशा आढळतात. त्या माशा चावल्याने माणूस आंधळा होतो. याविषयी माहित झाल्यावर मेक्सिकन सरकारने त्या ग्रामस्थांची मदत करण्याचा प्रयत्न केला. पण सरकारलाही यश मिळाले नाही.

सरकारने या लोकांचे दुसरीकडे पुनर्वसन करण्याचा प्रयत्न केला, पण ती लोकं दुसऱ्या वातावरणाशी जुळवून घेऊ शकले नाही. त्यामुळे नाईलाजास्तव लोकांना त्यांच्या हालवर सोडावे लागले.