काराकस : व्हेनेझुएलाच्या अध्यक्षपदी निकोलस मादुरो हे तिसऱ्यांदा निवडून आले आहेत. विरोधी पक्षाने निवडणुकीत गैरप्रकार झाल्याचा आरोप करीत निकालावर संशय व्यक्त केला आहे. अध्यक्षपदासाठी रविवारी (ता.२८) मतदान झाले होते. मतमोजणीनंतर काल रात्री उशीरा निकाल जाहीर करण्यात आला.

व्हेनेझुएलाच्या ‘नॅशनल इलेक्ट्रॉल कौन्सिल’ने मादुरो हे ५१ टक्के मत मिळवून विजयी झाल्याचे घोषित केले. प्रमुख विरोधक एडमुंडो गोंझालेझ यांना ४४ टक्के मते मिळाली. मादुरो निष्ठावंतांचे नियंत्रण असलेल्या येथील मुख्य निवडणूक यंत्रणेने देशभरातील प्रत्येकी ३० हजार मतदान केंद्रांवरील आकडेवारी लवकर जाहीर न केल्याने विरोधकांना निकालाला आव्हान देणे कठीण झाले. केवळ ३० टक्के मतदान पेट्यांची माहिती मिळाल्याचा दावा निवडणूक यंत्रणेने केला. मतदान केंद्रांवर काल मोठी गर्दी होती. नोंदणीकृत दोन कोटी लोकांनी मतदान केले होते.

निवडणुकीत विजय मिळणारच, असा ठाम विश्‍वास विरोधी पक्षाला होता. निकाल जाहीर होण्यापूर्वीच विरोधी पक्षाच्या नेत्यांनी सोशल मीडियावरून विजयाचे दावे करण्यास सुरुवात केली होती. मतदानोत्तर चाचण्यांमध्येही गोंझालेझ मोठ्या फरकाने जिंकणार असल्याचे सांगण्यात आले होते. यामुळे विरोधकांचा विश्‍वास दुणावला होता. पण निकाल पूर्णतः उलट लागल्याने विरोधकांनी निवडणुकीत गैरप्रकार झाल्याचा आरोप केला आहे.

परदेशी नेत्यांनी हा निकाल मान्य करण्यास नकार दिला आहे. निकालाची संपूर्ण आकडेवारी जाहीर करण्याचे आश्‍वासन निवडणूक यंत्रणेने दिल्याने विविध देशांच्या नेत्यांनी निकालाला मान्यता दिलेली नाही.

निकाल अधिकृत नसल्याने आम्ही त्याला मान्यता देणार नाही. जो निकाल जाहीर करण्यात आला आहे त्यात व्हेनेझुएलाच्या नागरिकांच्या इच्छेचे किंवा मतांचे प्रतिनिधित्व करीत नसल्याने अमेरिकेला गंभीर चिंता वाटत आहे.’’

अँटोनी ब्लिंकन, परराष्ट्र मंत्री, अमेरिका