कोरोनाचं संकट मावळत असतानाच आता जगभरात ठिकठिकाणी गोवरचा उद्रेक होऊ शकतो, असा इशारा जागतिक आरोग्य संघटनेनं (WHO) दिला आहे. सध्या जग कोरोनाच्या (Coronavirus) महाभयंकर संकटाचा सामना करत आहे. कोरोना व्हायरसची लस घेण्याच्या प्रक्रियेत जग इतकं व्यस्त झालं की, जगभरातील मुलांच्या लसीकरणावर याचा परिणाम झाला आहे.

अनेक देशांच्या लसीकरण कार्यक्रमाची पायाभूत सुविधा कोविड लसीकरणाचं लक्ष्य पूर्ण करण्यात व्यस्त होती. त्यामुळं आता गोवरनं (Measles Patient) पुन्हा एकदा डोकं वर काढलं असून धोका वाढला आहे. जागतिक आरोग्य संघटनेनं (World Health Organization) दिलेल्या माहितीनुसार, जगातील 4 कोटी लहान मुलांनी गोवरचा डोस चुकवला आहे. जवळपास 2.5 कोटी मुलांना गोवर लसीचा पहिला डोस अद्याप मिळू शकलेला नाही, तर 1.5 कोटी मुलांना दुसरा डोस मिळू शकलेला नाही. 2021 मध्ये गोवरची सुमारे 90 लाख प्रकरणे नोंदवली गेली आणि 1 लाख 28 हजार मृत्यूची नोंद झाली.

22 देशांमध्ये या आजाराचा प्रादुर्भाव झाला होता. प्रथम कोरोना व्हायरसच्या लसीकरणामुळं गोवरच्या लसीकरणावर परिणाम झाला आणि नंतर 2022 पर्यंत जगातील अनेक भागांमध्ये गोवरचा उद्रेक झाला. अलीकडं, गोवरचा उद्रेक लाखो जीव धोक्यात आणत आहे. जागतिक आरोग्य संघटनेनं (WHO) सांगितलंय की, एका प्रकरणामुळं 12 ते 18 जणांना या रोगाचा संसर्ग होऊ शकतो. ही परिस्थिती बिकट होत असल्यानं यूएन आरोग्य संस्थेनं निदर्शनास आणलं की, गेल्या वर्षीही विषाणूचा रोग तितकाच तीव्र होता. कोविड-19 विरुद्धच्या लसी विक्रमी वेळेत विकसित केल्या गेल्या, पण लाखो मुलं प्राणघातक रोगांविरुद्ध जीवनरक्षक लसीकरणापासून वंचित राहिली. डब्ल्यूएचओचे महासंचालक टेड्रोस अॅधानोम गेब्रेयसस म्हणाले, लसीकरण मोहीम पुन्हा रुळावर आणणं अत्यंत आवश्यक आहे. या अहवालातील प्रत्येक आकडेवारीच्या मागं एक प्रतिबंधित रोगाचा धोका आहे."

कोरोना व्हायरसवर नियंत्रण मिळवण्याच्या नादात 18 देशांमध्ये 6 कोटी डोस एकतर चुकले किंवा त्याला विलंब झाला आहे. गोवरचा व्हायरस हा सर्वात धोकादायक व्हायरसपैकी एक मानला जातो. पण चांगली गोष्ट ही आहे की लसीकरणाद्वारे हा रोग पूर्णपणे टाळता येऊ शकतो. हा व्हायरस पसरू नये म्हणून, जगातील 95% लोकसंख्येला लसीचे दोन्ही डोस मिळणे आवश्यक मानले जाते. परंतु प्रत्यक्षात फक्त 81% मुलांना गोवरचा पहिला डोस मिळाला आहे आणि फक्त 71% मुलांना दोन डोस मिळाले आहेत. 2008 नंतर इतक्या कमी लसीकरणाची नोंद झाली आहे.