Pak Influencer Sassy Reply Bartan dho jaker

नवी दिल्ली- सोशल मीडियावर एक व्हिडिओ सध्या चांगलाच व्हायरल होत आहे. लोक या व्डिडिओला खूप पसंद करत असून यातून पुरुषांनी बोध घ्यावा असं म्हणत आहेत. व्हिडिओ पाकिस्तानमधील एका सोशल मीडिया स्टारचा आहे. मुलगी सोशल मीडियावर लाईव्ह येऊन कोणताही प्रश्न विचारण्यास सांगते. यावेळी एक युझर तिला 'जाऊन भांडे घासून ये' म्हणतो. यावर ती मुलगी जे करते त्यावरुन तिचे कौतुक होत आहे.

कशफ अली नावाची पाकिस्तानी मुलगी लाईव्ह येते आणि काहीही विचारा असं युझर्संना आवाहन करते. यावर अनेकजण तिला उलटसुलट प्रश्न विचारतात. एकाने तिला अपमानास्पदरीत्या आधी जाऊन भांडे घासून ये असं म्हणतो. मुलगी लगेच युझरला आपल्या कृतीतून उत्तर देते. लगेच ती आपल्या किचनमध्ये जाते आणि लाईव्ह कॅमेरासमोर भांडे घासायला लागते. हे सगळं ते युझर्सना दाखवते.

भांडे घासणे झाल्यानंतर ती लगेच त्या युझरला उत्तर देते. ती म्हणते, 'मी भांडे घासले. असं करुन मी एक व्यक्ती म्हणून दुय्यम होते का? नाही ना, नेमकं काय झालं? एक काम होतं, ते मी केलं. महिलांसाठी अपमानजनक म्हणून तुम्ही या शब्दांचा का वापर करता? किचनमध्ये जा, भांडे घास. हे काय आहे? थोडं डोकं वापरा. जेवल्यानंतर भांडे घासावेच लागतील ना. प्रत्येकवेळी नवे भांडे घेणे परवडतं का? ही गोष्ट पण तुम्हाला समजवावी लागेल का?'

कशफ अली हिच्या या उत्तरानंतर अनेकांनी तिचे कौतुक केलं. सोशल मीडियावर अनेकांनी तिचं समर्थन केलंय. लैंगिक समानतेचा खूप मोठा मुद्दा तिने उपस्थित केला, असं एकाने म्हटलं. दुसऱ्या एका युझरने म्हटलं की, 'एखादी शिवी दिल्याप्रमाणे महिलांविरोधात अशा शब्दांचा का वापर केला जातो. भांडे घासण्यात अपमानास्पद काय आहे?'

सोशल मीडियावर ट्रोल करणाऱ्यांना अनेकदा टाळलं जातं. कारण असे लोक भरपूर असतात आणि त्यांना विनाकारण महत्व देणं अनेकजण टाळतात. पण, काही वेळा उत्तर देणं गरजेचं होत. अशीच वेळ कशफ अली हिच्यावर आली. तिने युझरला सडेतोड उत्तर दिले. त्यामुळे सोशल मीडियावरुन तिला कौतुकाची थाप दिली जात आहे