वॉशिंग्टन - लष्करे तैयबा आणि जैशे महंमद यांसारख्या दहशतवाद्यांना पाकिस्तानातून मोठ्या प्रमाणात रसद दिली जात असताना आणि भारत आणि अफगाणिस्तान हल्ले होत असताना ते रोखण्यास पाकिस्तान सरकार अपयशी ठरल्याचे अमेरिकी परराष्ट्रमंत्रालयाच्या अहवालात म्हटले आहे. दहशतवादी संघटनांत युवकांची होणारी भरती, शस्त्र चालवण्याचे प्रशिक्षण यासारख्या विघातक कारवाया होत असताना पाकिस्तानचे सरकार त्यावर अंकुश ठेऊ शकले नाही, असे नमूद केले आहे. एवढेच नाही तर या संघटनेशी निगडित काही जणांनी जुलै २०१८ मध्ये निवडणुकीच्या रिंगणात उतरून सत्तेत येण्याचाही प्रयत्न केल्याचे अहवालात म्हटले आहे. 

कंट्री रिपोर्टस ऑन टेररिझम-२०१८ या  अहवालात म्हटले, की पाकिस्तान हे अफगाणिस्तान तालिबान आणि हक्कानी नेटवर्कवर नियंत्रण मिळवण्यातही अपयशी ठरले आहे. या दोन्ही संघटनांनी पाकिस्तानात राहून घातपाती कारवाया केल्या आहेत.