इस्लामाबाद : पाकिस्तानमधील एका Tik Tok युवतीच्या व्हिडिओमुळे पाकिस्तान सरकार व पंतप्रधान इम्रान खान यांची खिल्ली उडवली जात आहे. शिवाय, पाकिस्तानच्या सुरक्षा व्यवस्थेचे तिने वाभाडे काढले आहेत. संबंधित व्हिडिओ सोशल मीडियावर मोठ्या प्रमाणात व्हायरल झाला आहे.

पाकिस्तानच्या परराष्ट्र मंत्रालयात कडक सुरक्षा व्यवस्था असतानाही हरीम शाह या Tik Tok युवतीने प्रवेश केला. शिवाय, परराष्ट्र मंत्रालयातील कॉन्फरन्स रूममध्ये जाऊन तिने व्हिडिओ तयार केला आहे. या व्हिडिओमुळे पाकिस्तान सरकार आणि पंतप्रधान इम्रान खान यांची चांगलीच खिल्ली उडवली जात आहे. युवतीने परराष्ट्र मंत्रालयात प्रवेश केल्यानंतर फोटो काढले. हिंदी गाण्यांवर टीक टॉक व्हिडिओ तयार केला. एवढेच नाही तर पंतप्रधान इम्रान खान ज्या खुर्चीवर बसतात चक्क त्या खुर्चीत बसून व्हिडिओ करत असल्याचेही दिसत आहे.

संबंधित व्हिडिओ सोशल मीडियावर व्हायरल झाल्यानंतर नेटिझन्सनी पाकिस्तान सरकार व इम्रान खान यांना ट्रोल केले आहे. पण, परराष्ट्र मंत्रालयाची परवानगी घेऊन प्रवेश केल्याचे हरीमने सांगितले. नियमांविरोधात असेल तर अधिकाऱ्यांनी परवानगीच कशी दिली? असा प्रश्नही तिने उपस्थित केला आहे. दरम्यान, पाकिस्तान सरकारने याबाबत चौकशीचे आदेश दिले आहेत.