Corona Updates: इस्लामाबाद : जगभरातील जवळपास सर्वच देशात कोरोनाचा धुमाकूळ सुरू आहे. पाकिस्तानलाही याचा फटका बसला आहे. शेजारील तसेच मित्र राष्ट्रांकडून कोरोना लसी घेऊन लसीकरण मोहीम राबविणाऱ्या पाकिस्तानने एक मोठा दावा केला आहे. फक्त एकाच डोसमध्ये कोरोनाला प्रतिबंध घालणारी लस तयार करण्यात येणार असून यासाठी चीनची मदत घेतली जाणार आहे. 

पाकिस्तानच्या एक्सप्रेस ट्रिब्यूनने दिलेल्या वृत्तानुसार, नॅशनल असेंब्लीच्या पॅनेलला एका अधिकाऱ्याने याबाबतची माहिती दिली. पाकिस्तानची राष्ट्रीय आरोग्य संस्था (NIH) लवकरच स्वतःची कोरोना लस तयार करणार आहे. ज्याचा फक्त एकच डोस कोरोनाबाधितांना घ्यावा लागणार आहे. ही लस चीनची कॅन्सिनोबायो (CansinoBio) असेल आणि पाकिस्तान ही लस तयार करण्यासाठी चीनच्या तंत्रज्ञानाचा वापर करणार आहे. पाकिस्तानने यासाठी क्लिनिकल ट्रायलही घेतल्या आहे. 

- जॉन्सन अँड जॉन्सन लशीमुळे रक्तात गुठळ्या? अमेरिकेत वापराला ‘ब्रेक'

NIHचे कार्यकारी संचालक मेजर जनरल आमीर इकराम यांनी म्हटले आहे की, चीनकडून लसीचे तंत्रज्ञान हस्तांतरित करण्याची विनंती पाकिस्तानने केली आहे. या लसीसाठी कच्चा माल या महिन्यात पाकिस्तानमध्ये येणार आहे. त्याआधीच चीनची एक टीम पाकिस्तानात दाखल झाली आहे.

दरम्यान, पाकिस्तानने यावर्षी ३ फेब्रुवारीपासून कोरोना लसीकरण मोहिमेला सुरवात केली. चीनने दिलेल्या ५ लाख कोरोना लसींच्या आधारे हे ऑपरेशन सुरू करण्यात आले. ग्लोबल अलायन्स फॉर वैक्सीन अॅण्ड इम्युनायजेशन (GAVI)च्या माध्यमांतून पाकिस्तानला भारताने तयार केलेली वॅक्सीनही मिळणार आहे. जूनपर्यंत पाकिस्तानला १.६ कोटी कोरोना प्रतिबंधक लसी मिळणे अपेक्षित आहे. 

- लसीच्या भरवशावर राहू नका, संसर्ग संपण्यास खूप वेळ; WHO प्रमुखांचा इशारा

वर्ल्डोमीटरवरील आकडेवारीनुसार, पाकिस्तानमध्ये सध्या ७ लाख ३४ हजार ४२३ कोरोना रुग्णांची नोंद झाली आहे. तर १५ हजार ७५४ जणांचा कोरोनामुळे मृत्यू झाला आहे. पाकिस्तानमध्ये कोरोना चाचण्यांची संख्या कमी असल्याने तेथील रुग्णसंख्याही कमी असल्याचे दिसून येते. 

- जगभरातील बातम्या वाचण्यासाठी येथे ► क्लिक करा

(Edited by: Ashish N. Kadam)