अफगाणिस्तानला (Afghanistan) भारतातून (India) गहू आणि जीवनावश्यक वस्तूंचा पुरवठा करण्यासाठी पाकिस्तानने (Pakistan) थोडी अडेलतट्टू अशी भूमिका घेतली होती. दरम्यान, आता काही अटींवर पाकिस्तानने भारतातून ट्रक नेण्यास परवानगी दिली आहे. याची माहिती भारताच्या परराष्ट्र खात्याला देण्यात आली आहे. मानवतावादी दृष्टीकोनातून अपवादात्मक परिस्थितीत वाघा सीमेवरून (Wagah Border) तोरखामपर्यंत वाहतुकीसाठी अफगाण ट्रक वापरून वाहतुकीला परवानगी देण्यात आली आहे. वाघा बॉर्डरमार्गे भारतातून अफगाणिस्तानला ५० हजार मेट्रिक टन गहू आणि जीवनावश्यक साहित्य, औषधे पाठवण्यात येणार आहे.

अफगाणिस्तानला भारतातून गहू आणि इतर साहित्य पाठवण्याबाबत परवानगी देण्याचा हा निर्णय पाकिस्तानने भारताच्या परराष्ट्र खात्याला कळवला आहे. आता भारताने अफगाणिस्ताला मदत पोहोचवण्यासाठी योग्य ती पावलं उचलावीत आणि मदत पोहोचवावी असंही पाकिस्तानने म्हटलं आहे.

पाकिस्तानने आधी भारतातून वाघा बॉर्डरमार्गे भारतीय किंवा अफगाणिस्तानच्या ट्रकमधून नेण्याचा प्रस्ताव फेटाळला होता. भारत जो प्रस्ताव मान्यच होणार नाही असा प्रस्ताव देऊन आपली पावले मागे घेत असल्याचा आरोप पाकिस्तानकडून करण्यात आला होता.

भारताने ७ ऑक्टोबरला ५० हजार टन गहू, औषधे आणि वैद्यकीय उपकरणे अफगाणिस्तानला मानवतावादी दृष्टीकोनातून मदत म्हणून पाठवण्याची घोषणा केली होती. मदत पाकिस्तानमार्गे पाठवण्यासाठी भारताच्या परराष्ट्र मंत्रालयाने पाकिस्तानला पत्र लिहिलं होतं. यावर उत्तर देताना सुरुवातीला पाकिस्तानने म्हटलं होतं की, भारतातील ट्रक वाघा बॉर्डरवर त्यातील माल उतरतील, तिथून पाकिस्तानच्या ट्रकमध्ये माल लादून तो अफगाणिस्तानपर्यंत पोहोचवला जाईल.