China Zoo Panda Dogs : चीनमधील एका प्राणीसंग्रहालयातील व्हिडिओ सध्या सोशल मीडियावर व्हायरल होतो आहे. या प्राणीसंग्रहालायत पांडा म्हणून चक्क श्वानांना रंग देऊन पिंजऱ्यात ठेवण्यात आलेलं समोर आलं. यानंतर सोशल मीडियामध्ये याबाबत विविध प्रकारच्या प्रतिक्रिया पहायला मिळत आहेत.

स्थानिक माध्यमांनी दिलेल्या माहितीनुसार, या झूमध्ये चाऊ-चाऊ जातीच्या श्वानांना पांडा म्हणून सादर केलं जात होतं. या श्वानांना प्राणीसंग्रहालय प्रशासन 'पांडा डॉग्स' असं म्हणत आहे. हे डॉग्स नक्कीच क्यूट आणि मनोरंजक आहेत. मात्र, यामुळे कित्येक लोक नाराज देखील झाले आहेत. ही झू पहायला आलेल्या प्रेक्षकांची फसवणूक आहे; तसंच श्वानांवर देखील अत्याचार होत असल्याचं नेटिझन्सचं म्हणणं आहे.

या प्राणीसंग्रहालयाने Chow Chow श्वानांचे केस अशा प्रकारे कापले आहेत, की ते लांबून पांडाप्रमाणे गोलू-मोलू दिसतील. त्यानंतर त्यांनी या श्वानांना पांडा प्रमाणेच ब्लॅक अँड व्हाईट रंग दिला. मात्र तरीही त्यांची हालचाल आणि भुंकणं यामुळे ते पांडा नसल्याचं लगेच दिसून येत आहे.

प्रशासन निर्णयावर ठाम

प्राणीसंग्रहालय प्रशासनाने मात्र आपल्या या निर्णयाची पाठराखण केली आहे. "आमच्याकडे पांडा नाहीत म्हणून आम्ही ही शक्कल लढवली आहे. श्वानांना रंग देण्याबद्दल देखील काही अडचण नसावी. आपण स्वतः देखील हेअर डाय करतोच. नैसर्गिक रंग वापरून श्वानांना देखील रंग दिला जाऊ शकतो.." असं प्राणीसंग्रहालायाच्या एका प्रवक्त्याने म्हटलं आहे.