वॉशिंग्टन : पंतप्रधान मोदी सध्या अमेरिका दौऱ्यावर आहेत. स्थानिक वेळेनुसार, गुरुवारी मोदींनी अमेरिकेच्या उपराष्ट्राध्यक्ष कमला हॅरिस यांची भेट घेतली आहे. या भेटीवेळी पंतप्रधान मोदींनी एक अनोखी अशी भेटवस्तू अमेरिकेच्या उपराष्ट्राध्यक्ष कमला हॅरिस यांना दिली आहे. कमला हॅरिस यांच्यासोबतच इतर क्वाड लीडर्सना देखील मोदींनी भेटवस्तू दिल्या आहेत.

भारतीय वंशाच्या कमला हॅरिस यांना त्यांच्या भारताशी असलेल्या नात्याची आठवण व्हावी, म्हणून मोदींनी एक खास भेटवस्तू त्यांना देऊ केली आहे. मोदी यांनी कमला हॅरिस यांचे आजोबा पीव्ही गोपालन यांच्याशी निगडीत काही जुन्या वस्तू दिल्या आहेत. पीव्ही गोपालन हे त्यांच्यावेळचे एक वरिष्ठ सरकारी अधिकारी होते, ज्यांनी वेगवेगळ्या पदावर काम केलं होतं. लाकडाच्या हस्तशिल्प फ्रेममध्ये सुशोभित करुन ही भेट देण्यात आली आहे.

बुद्धीबळाचा खास सेट

पंतप्रधान मोदींनी कमला हॅरिस यांना गुलाबी मिनाकारी नक्षीदार असा बुद्धीबळाचा सेट देखील दिला आहे. हा सेट जगातील सर्वांत जुन्या शहरांमध्ये सामील असणाऱ्या काशीशी निगडीत आहे. पंतप्रधान मोदी इथूनच खासदार आहेत. या बुद्धिबळ संचाचा प्रत्येक संच हस्तनिर्मित आहे, त्याचा तेजस्वी रंग काशीचे तेज दर्शवतो.

ऑस्ट्रेलियाचे पंतप्रधान स्कॉट मॉरिसन यांनी देखील पंतप्रधान मोदींची भेट घेतली. यावेळी त्यांनाही अनोखे असे मिनाकारी जहाजाचे शिल्प दिले आहे.

जपानचे पंतप्रधान योशीहिदे सुगा यांना पंतप्रधान मोदी यांनी चंदनापासून बनवलेली एक बुद्धाची मुर्ती दिली आहे. जपानच्या पंतप्रधानांसोबत झालेल्या बैठकीत मोदींनी द्विपक्षीय संबंधांचा आढावा घेतला आणि अफगाणिस्तानसह अलीकडील जागतिक घडामोडींवर विचारांची देवाणघेवाण केली. यावेळी पंतप्रधान मोदींनी मुक्त, खुल्या आणि सर्वसमावेशक इंडो-पॅसिफिक क्षेत्राबद्दलच्या आपल्या वचनबद्धतेबद्दल सांगितले.