पंतप्रधान नरेंद्र मोदींनी अमेरिका दौऱ्यामध्ये तेथील संसदेला संबोधित केलं. यावेळी त्यांनी भारत-अमेरिका संबंधांवर भाष्य केलं. ते म्हणाले, की लोकांमध्ये असलेल्या समानतेच्या जोरावर अमेरिका टिकून आहे. जगभरातून आलेल्या लोकांना समान वागणूक देत, अमेरिकेने त्यांना आपल्या सोबत घेतलं आहे.

भारतातील लाखो लोक

अमेरिकेत भारतातून आलेले लाखो लोक आहेत. यांपैकी कित्येक लोक इथं संसदेत देखील बसले आहेत. विशेष म्हणजे, यांपैकीच एक माझ्या मागेही उभ्या आहेत, ज्यांनी खरंतर इतिहास रचला होता. पंतप्रधान मोदी यावेळी कमला हॅरिस यांच्याबद्दल बोलत होते.

कमला हॅरिस या अमेरिकेच्या पहिल्या अशा उपराष्ट्रपती आहेत, ज्या भारतीय वंशाच्या आहेत. पंतप्रधान मोदी पुढे म्हणाले, की अमेरिकेच्या संसदेत हल्ली समोसा कॉकसचा प्रभाव भरपूर दिसून येतो. मला विश्वास आहे, की आता विविध भारतीय खाद्यपदार्थ देखील इथं पहायला मिळतील.

समोसा कॉकस म्हणजे काय?

अमेरिकेच्या संसदेत असणाऱ्या भारतीय वंशाच्या खासदारांना गमतीने समोसा कॉकस (Samosa Caucus) म्हटलं जातं. २०१६ साली झालेल्या अमेरिकेतील राष्ट्रपती निवडणुकीत याची सुरुवात झाली. या निवडणुकीमध्ये पहिल्यांदाच अमेरिकेत भारतीय वंशाचे काही लोक खासदार म्हणून निवडून आले होते. यानंतर हे लोक संसदेत कित्येक वेळा एकत्र बसलेले दिसत.

अमेरिकी प्रतिनिधी सभेचे सदस्य राजा कृष्णमूर्ती यांनी या काळात पहिल्यांदा या खासदारांच्या गटाला समोसा कॉकस असं नाव दिलं होतं. कमला हॅरिस या देखील या गटातील एक प्रमुख सदस्य होत्या. अमेरिकेच्या संसदेत भारतीय वंशाच्या खासदारांची संख्या लक्षात यावी, यामुळे हे नाव दिल्याचं राजा कृष्णमूर्ती यांनी म्हटलं होतं.

दरम्यान, पंतप्रधान मोदींनी देखील समोसा या खाद्यपदार्थाचा उल्लेख करून केलेल्या कौतुकानंतर कमला हॅरिस हसू लागल्या होत्या. तर, संसदेतील इतर खासदारांनी टाळ्या वाजवून मोदींच्या या कौतुकाला दाद दिली.