बगदाद: इराणचे पाठबळ असलेल्या पॉप्युलर मोबिलायझेशन फोर्स (पीएमएफ) या दहशतवादी संघटनेच्या बगदादमधील मुख्यालयावर आज हवाई हल्ला झाला. या हल्ल्यात या संघटनेचा एक प्रमुख म्होरक्या मारला गेला. हा हल्ला कोणी केला हे स्पष्ट झाले नसले तरीही यामागे अमेरिकेचा हात असल्याचा आरोप या संघटनेने केला आहे.

इस्राईल आणि हमास यांच्या युद्धाचे पडसाद इतर प्रदेशांतही उमटत असतानाच इराकची राजधानी बगदादमध्ये हा लक्ष्यवेधी हल्ला झाला. ‘पीएमएफ’ ही विविध दहशतवादी संघटनांची मिळून बनलेली संघटना असून तांत्रिकदृष्ट्या त्यांच्यावर इराकच्या सैन्याचे नियंत्रण आहे. इराणमध्ये कालच (ता. ५) मोठा स्फोट होऊन ९५ जणांचा मृत्यू झाला.

हा हल्ला कोणी केला, याचा शोध सुरू असतानाच इराणच्या पाठबळावरील संघटनेच्या मुख्यालयावर आज हल्ला झाला. या हल्ल्यात संघटनेच्या बगदादमधील कारवायांचा उपप्रमुख तालिब अल सैबी उर्फ अबु तकवा आणि आणखी एक जण मारला गेला. तकवा हा इमारतीच्या गॅरेजमध्ये त्याच्या मोटारीत बसला असतानाच त्या मोटारीवर बॉम्ब टाकण्यात आला. यानंतर इराकच्या लढाऊ विमानांनी आकाशात गस्त घालण्यास सुरुवात केली. (Latest Marathi News)

इस्राईल-हमास युद्ध सुरू झाल्यापासून ‘पीएमएफ’ने इराक आणि सीरियामधील अमेरिकेच्या तळांवर शंभरहून अधिक हल्ले केले आहेत.