जपानी राजकुमारी 'माको'ने एका सामान्य व्यक्तीशी लग्न केलंय. यामुळे तिचा रॉयल दर्जा गमवावा लागला आहे. शाही कुटुंबीय अन्य शाही कुटुंबीयांशीच लग्नाचं नातं प्रस्थापित करतात. मात्र राजकुमारीने तिच्या प्रियकराला दिलेला शब्द पाळला आणि प्रेमासाठी तिने रॉयल दर्जा सोडला. आता या लग्नामुळे आता स्थानिक नागरिकांमध्ये संमिश्र प्रतिक्रिया येत आहेत. याचसोबत आर्थिक वाद आणि राजकुमारीच्या सासू-सासऱ्यांशी संबंधित काही प्रकरणांमुळे या लग्नाला तीन वर्ष उशीर झाला.

माको आणि केई कोमुरो यांच्या लग्नाचे कागदपत्र मंगळवारी सकाळी राजवाड्यातील अधिकाऱ्याने सादर केले होते. आता ते अधिकृत झाल्याचं इम्पीरियल हाउसहोल्ड एजन्सीने सांगितलं. राज घराण्याशी संबंध संपल्याने माकोने लग्नानंतर तिच्या पतीचे आडनाव लावले आहे. यामुळे आता ती माको कोमुरो बनली आहे. तिला प्रथमच असं कौटुंबिक नाव मिळालं आहे. जपानच्या शाही कुटुंबात केवळ पुरुष सदस्यांना घरातील नावं दिली जातात. तर महिला सदस्यांना फक्त पदव्या असतात. आणि त्यांनी सामान्य लोकांशी लग्न केल्यास त्यांना या पदव्यांचा त्याग करावा लागतो.

युद्धपूर्व काळातील पितृसत्ताक पद्धती शाही कुटुंबाने अजूनही जिवंत ठेवली आहे. जपानी लिंग(जेंडर) धोरणांमध्ये देखील हे दिसून येतं. मात्र बरेच लोक ही पद्धती कालबाह्य असल्याची टीका करतात. या संस्कृतीत विवाहित जोडप्यांना फक्त एकच आडनाव वापरणं आवश्यक आहे. आणि बहुधा ते पतीचं आडनाव असतं. लवकरच हे नव दाम्पत्य पत्रकार परिषद घेणार आहे.

माकोच्या लग्नाबद्दल माध्यमांनी केलेल्या नकारात्मक वार्तांकनाने माकोच्या मानसिक आरोग्यावर परिणाम झाला होता. या महिन्याच्या सुरुवातीला पॅलेसच्या डॉक्टरांनी याबद्दल माहिती देत, माकोच्या मनावर आघात झाल्याचं सांगितलं होतं.

लग्नाच्या तीन दिवस आधी ३० वर्षांची झालेली माको ही सम्राट नारुहितोची भाची आहे. ती आणि कोमुरो टोकियोच्या आंतरराष्ट्रीय ख्रिश्चन विद्यापीठात वर्गमित्र होते. त्यांनी सप्टेंबर 2017 मध्ये त्यांनी पुढील वर्षी लग्न करण्याचं जाहीर केलं. परंतु दोन महिन्यांनंतर आर्थिक वाद निर्माण झाला आणि लग्न स्थगित करण्यात आलं. अखेर राजकुमारी आणि कोमुरो लग्नबंधनात अडकणार आहेत.