वॉशिंग्टन : ‘‘पुतीन दुष्ट हुकूमशहा असतील, जे सत्य आहे, तर याचा अर्थ असा नाही, की युक्रेन चांगला आहे,’’ अशी टीका अमेरिकेच्या अध्यक्षपदाच्या उमेदवारीच्या शर्यतीमधील रिपब्लिकन पक्षाचे भारतीय वंशाचे नेते विवेक रामास्वामी यांनी युक्रेनचे अध्यक्ष व्होलोदिमीर यांच्यावर केली.

देशात निवडणूक घेण्यासाठी अमेरिकेकडून जादा निधीची मागणी झेलेन्स्की यांनी केल्याने रामास्वामी यांनी त्यांच्यावर तोंडसुख घेतले. ‘फॉक्स न्यूज’शी बोलताना त्यांनी अमेरिकेत २०२४ मध्ये होणाऱ्या अध्यक्षीय निवडणुकीत रिपब्लिकन पक्षाचे उमेदवार म्हणून त्यांचे नाव निश्‍चित होण्याची प्रक्रिया सुरू आहे, असे सांगितले. अमेरिकेच्या अध्यक्षपदी निवडून आल्यास युक्रेनला मिळणाऱ्या मदतीत कपात करू, या त्यांच्या पूर्वीच्या विधानाचे समर्थन रामास्वामी यांनी केले.

झेलेन्स्कींवर टीका करताना ते म्हणाले,‘‘ मला लांगूलचालन आवडत नाही. पण मी खूप स्पष्ट भूमिका घेऊ इच्छितो. आम्हाला इथे अमेरिकी नागरिकांबरोबर राहायचे आहे. पुतीन एक दुष्ट हुकूमशहा असतील, जे ते आहेत; तर याचा अर्थ असा नाही की युक्रेन भला आहे. हा (युक्रेन) एक असा देश आहे, ज्याने ११ विरोधी पक्षांवर निर्बंध घातले आहेत.

याच देशाने सर्व माध्यम संघटनांचे एका सरकारी शाखेत विलीनीकरण केले. त्याच्याच अध्यक्षांनी गेल्या आठवड्यात एका नाझीची प्रशंसा केली होती.’’ अमेरिकेने जास्त निधी दिला नाही तर या वर्षी युक्रेनमध्ये सार्वत्रिक निवडणूक घेणार नाही, अशी धमकी झेलेन्स्की यांनी दिली आहे, असेही त्यांनी सांगितले.

अमेरिका फर्स्ट’साठी

रामास्वामी म्हणाले, ‘‘नोव्हेंबर २०२४मधील निवडणुकीसाठी रिपब्लिकन पक्षाचा उमेदवार म्हणून माझे नाव निश्‍चित होण्याच्या मार्गावर आहे. पाच-सहा महिन्यांपूर्वी या देशातील बहुतांश लोक मला ओळखत नव्हते. आता अनेक मुद्द्यांवर राष्ट्रीय सरासरीत मी तिसऱ्या क्रमांकावर आहे. नामांकन जाहीर करण्याच्या स्थितीत आम्ही आहोत.

पण माझ्या किंवा ट्रम्प यांच्यासाठीही ते महत्त्वाचे नाही; तर अमेरिकेला पहिल्या स्थानी ठेवण्यासाठी ते महत्त्वाचे आहे. हा संदेश संपूर्ण देशात गेला आहे. पुढील पिढीपर्यंत पोहोचण्यासाठी दुसऱ्या पिढीतील एखाद्या व्यक्तीची आवश्‍यकता भासणार आहे.’’