रशियामध्ये सध्या वॅगनर ग्रुप या सैनिकांच्या समूहाने केलेल्या बंडामुळे वातावरण तापलं आहे. यावर प्रतिक्रिया देत राष्ट्राध्यक्ष व्लादिमीर पुतीन यांनी हा देशद्रोह असल्याचं म्हटलं आहे. यासोबतच त्यांनी वॅगनर ग्रुपला निर्वाणीचा इशाराही दिला आहे.

काय आहे प्रकरण?

वॅगनर ग्रुप हा एक भाडोत्री सैनिकांचा समूह आहे, जो रशियाच्या सरकारसाठी काम करतो. युक्रेन युद्धासाठीदेखील रशियाने याच सैनिकांना पाचारण केलं होतं. मात्र, आता या ग्रुपने रशियाविरुद्ध सशस्त्र उठाव केला आहे. त्यामुळे रशियामध्ये मोठं अंतर्गत युद्ध होण्याची शक्यता वर्तवण्यात येत आहे.

रॉयटर्सने दिलेल्या माहितीनुसार, वॅगनरच्या सैनिकांनी मॉस्कोच्या ५०० किलोमीटर दक्षिणेला असलेल्या वोरोनिश शहरातील सर्व आर्मी पोस्टवर ताबा मिळवला आहे. रशियाच्या संरक्षण मंत्र्यांना पदावरुन हटवण्याच्या मागणीसाठी हा उठाव झाल्याचं म्हटलं जात आहे.

पुतीन यांचा इशारा

पुतीन यांनी या सशस्त्र उठावाला देशद्रोह म्हटले आहे. वॅगनरने जो आपल्या पाठीत खंजीर खुपसला आहे, त्याची शिक्षा त्यांना नक्कीच मिळेल. रशियाच्या रक्षणासाठी जे करता येईल, ते मी करेल. तसेच, रोस्तोव-ऑन-डॉन शहरातील परिस्थिती सांभाळण्यासाठी निर्णायक कारवाई करण्यात येईल, असंही पुतीन यावेळी म्हणाले. वॅगनर सेनेचा प्रमुख येवगेनी प्रिगोझिन याने हे शहर आपल्या ताब्यात असल्याचा दावा केला आहे.

रशियाच्या भविष्यासाठी..

यावेळी देशाला संबोधित करताना पुतीन म्हणाले, की रशिया सध्या आपल्या भविष्यासाठी सगळ्यात कठीण लढाई लढत आहे. देशात भाऊ-भावाविरुद्ध उभा राहत आहे. यासाठी वॅगनर सेनेने केलेला विश्वासघात कारणीभूत असून, त्यांना आपण त्यांच्याच भाषेत उत्तर देऊ असं पुतीन यावेळी म्हणाले.

सेना मुख्यालयात येवगेनी

वॅगनर सेना ही खरंतर युक्रेनमध्ये तैनात करण्यात आली होती. मात्र, आता आपण रशियातील एका महत्त्वाच्या सेना मुख्यालयात असल्याचा दावा येवगेनीने केला आहे. त्याने स्वतःचा एक व्हिडिओही पोस्ट केला आहे, ज्यामध्ये तो रशियाच्या सेना मुख्यालयात दिसतोय.