रशिया आणि युक्रेनमधील वाद आणखी चिघळण्याची चिन्ह आहेत. रशियाने युक्रेनच्या मोठ्या शहरांवर ताबा मिळवल्यानंतर मोठ्या प्रमाणात नुकसान झालं आहे. आतापर्यंत २५० हून अधिक जणांचा यामध्ये मृत्यू झालाय. दरम्यान, युक्रेनमध्ये झालेल्या नुकसानाचा रशियाने पाढाच वाचून दाखवलाय.

रशियाने युक्रेनवर बॉम्बहल्ले करण्यास सुरुवात केली. यानंतर युक्रेननेही रशियाची लढाऊ विमानं आणि क्षेपणास्त्र पाडल्याचा दावा केला होता. रशियाचे राष्ट्राध्यक्ष व्लादिमीर पुतीन यांनी युक्रेनला शरणागती पत्करण्याची धमकी देखील दिली, मात्र लढण्याचा पवित्रा कायम ठेवत युक्रेनने दोन हात करण्याची तयारी दाखवली. अखेर युक्रेनने रशियासोबत वाटाघाटी करण्याची तयारी दाखवली आहे. मात्र, तोपर्यंत युक्रेनचं मोठ्या प्रमाणात नुकसान झालंय.

223 रणगाडे आणि इतर लढाऊ वाहने, 28 विमाने , 39 एकाधिक रॉकेट लाँचर, 86 फील्ड आर्टिलरी माउंट्स आणि मोर्टार, 143 विशेष लष्करी वाहने नष्ट केल्याची माहिती रशियन संरक्षण मंत्रालयाच्या प्रवक्त्यांनी दिली आहे.

सर्व युक्रेनियन सैनिकांना आदरपूर्ण वागणूक दिली असून मदत देखील पुरवल्याचं रशियाने सांगितलं. कागदपत्रे भरल्यानंतर आणि अधिकृत प्रक्रिया झाल्यानंतर त्यांना कुटुंबीयांकडे सुपूर्द करण्यात येईल, असं रशियन एजन्सीने स्पष्ट केलं.

गेल्या २४ तासांत, लुगान्स्क पीपल्स रिपब्लिकच्या सैन्याने यशस्वी ऑपरेशन्स राबवले आहेत. नोवोख्टिर्का, स्मोल्यानिनोवो, स्टॅनिच्नो-लुहान्सकोई या ठिकाणच्या युक्रेनी वसाहतींवर ताबा मिळवल्याचं रशियन संरक्षण मंत्रालयाच्या प्रवक्तांनी सांगितलं.