रशियाच्या (Russian) सैन्याने युक्रेनवर (ukraine) हल्ले सुरू केले आहेत. या हल्ल्यांत युक्रेनमधील अनेक हवाई तळ आणि हवाई संरक्षण तळ उद्ध्वस्त केल्याचा दावा रशियाने केला आहे. युक्रेनविरुद्ध रशियाने तीन बाजूंनी सैन्य तैनात केले आहे. रशियन सैनिकांनी त्यांच्या देशाला उत्तर, पूर्व आणि दक्षिणेकडून घेरले आहे. युक्रेन सैन्यांना कठीण आव्हानाचा सामना करावा लागत आहे, असे युक्रेनचे सल्लागार मिखाइलो पोडोल्याक म्हणाले.

आम्हाला जगाची गरज आहे. यावेळी जगातील सर्व देशांनी लष्करी तांत्रिक सहाय्य दिले पाहिजे. याशिवाय आर्थिक मदतही करावी. रशियाने तीन दिशांनी सैन्य तैनात केले आहे, तर चौथ्या बाजूने सायबर हल्ले केले जात आहेत. आमच्या सैन्यांनी चोख प्रत्युत्तर दिले आणि शत्रूंना मोठे नुकसान सहन करावे लागले आहे, असेही युक्रेनच्या सल्लागाराने सांगितले.

युक्रेनचे संरक्षण मंत्रालय, परराष्ट्र मंत्रालय आणि गृह मंत्रालयाच्या वेबसाइट्स गुरुवारी उघडत नव्हत्या किंवा अत्यंत संथ होत्या. हेही रशियामुळेच घडल्याचे युक्रेनचे म्हणणे आहे. यापूर्वीही युक्रेनवर (ukraine) सायबर हल्ला (cyber attacks) झाला होता. सायबर सुरक्षेतील तज्ज्ञांचे म्हणणे आहे की, अज्ञात लोकांनी सायबर हल्ले करून शेकडो संगणक संक्रमित केले आहेत.

युक्रेनशिवाय लॅटव्हिया आणि लिथुआनियासारख्या देशांमध्येही असे हल्ले झाले आहेत. युक्रेननेही रशियन हल्ल्यांना मुत्सद्दीपणे उत्तर दिले आहे. युक्रेनचे राष्ट्राध्यक्ष वोलोडिमिर झेलेन्स्की यांनी गुरुवारी रशियासोबतचे (Russian) सर्व राजनैतिक संबंध संपुष्टात आणल्याची घोषणा केली. ते म्हणाले की, रशियाने अचानक केलेला हल्ला पाहता आपण हे पाऊल उचलणे गरजेचे झाले आहे.