इंग्लंडमध्ये जमावावर झालेल्या अंदाधुंद गोळीबारात सहा जणांचा मृत्यू झाला आहे. यामध्ये एक लहान मुलाचाही समावेश आहे. दक्षिण पश्चिम इंग्लंडमधील प्लायमाउथ शहरात काही अज्ञात लोकांनी जमावावर अचानक अंदाधुंद गोळीबार केला. यामुळेच गदारोळ माजला होता. यामध्ये सहा जणांचा जागीच मृत्यू झाला आहे. रॉयटर्सने याबाबतचे वृत्त दिले आहे.

प्लायमाउथ शहरात जमावावर झालेली घटना धक्कादायक असल्याची प्रतिक्रिया ब्रिटनच्या गृह सचिव प्रीति पटेल यांनी दिली आहे. प्रीति पटेल यांनी ट्विटरवर या घटनेबाबत आपली प्रतिक्रिया दिली. या हल्ल्यात मृत पावलेल्यांमध्ये दोन महिला, तीन पुरुष आणि एका लहान मुलाचा समावेश आहे. गोळी लागल्यामुळे उपचारासाठी एका महिलेला रुग्णालयात दाखल करण्यात आलं होतं. मात्र, उपचारादरम्यान त्या महिलेचा मृत्यू झाल्याचे वृत्त आहे.

या घटनेचा दहशतवादी हल्ल्याशी कोणताही संबंध नसल्याचं प्लायमाउथ पोलिसांनी सांगितलं. प्लायमाउथ सटन आणि डेवोनपोर्टचे खासदार ल्यूक पोलार्ड म्हणाले की, ही घटना भयानक आणि धक्कादायक आहे. मृत्यू पावलेल्यांमध्ये लहान मुलाचा समावेश असल्याचं समजल्यानंतर दु:ख झालं.