लंडन : लॉकडाउनच्या काळात आयोजित केलेल्या पार्टीला हजर राहिल्याबद्दल ब्रिटनचे पंतप्रधान बोरीस जॉन्सन यांनी आज अखेर माफी मागितली. मात्र, नियमांचा भंग होत आहे असे त्यावेळी जाणवले नाही आणि संसदेचीही आपल्याला दिशाभूल करायची नव्हती, असे त्यांनी स्पष्ट केले.

कोरोना संसर्गस्थितीमुळे लॉकडाऊन लागू असताना जून २०२० मध्ये ब्रिटनचे पंतप्रधान बोरीस जॉन्सन यांच्याच सरकारी निवासस्थानी त्यांच्या वाढदिवसानिमित्त पार्टीचे आयोजन करण्यात आले होते. या पार्टीबाबत जॉन्सन यांना पूर्वकल्पना नसली तरी नंतर ते यामध्ये सहभागी झाले होते. या प्रकरणी नियमभंग झाल्याबद्दल त्यांनी गेल्याच आठवड्यात ५० पौंडांचा दंडही भरला.

यामुळे पदावर असताना कायद्याचा भंग करणारे ते पहिले पंतप्रधान ठरले. लॉकडाऊनच्या काळात त्यांनी आणि त्यांच्या सहकाऱ्यांनी २०२० आणि २०२१ मध्ये कार्यालयातही पार्टी केल्याचा आरोप असून त्याबाबत पोलिस तपास करत आहेत. जॉन्सन यांनी पदाचा राजीनामा द्यावा, या मागणीनेही दरम्यानच्या काळात जोर धरला होता. आज लोकप्रतिनिधीगृहात बोलताना जॉन्सन यांनी सभागृहाची आणि जनतेची माफी मागितली.