श्रीलंकेत (Sri-lanka News) गेल्या अनेक दिवसांपासून अत्यंत बिकट परिस्थिती निर्माण झाली आहे. खाण्या-पिण्याच्या वस्तूंपासून पेट्रोलियम उत्पादनांच्या किंमती गगनाला भिडल्या आहेत. सध्या श्रीलंकेतील नागरिकांसाठी पुरेसं इंधन उपलब्ध नाही. दरम्यान, आता देशात वीज टंचाईच्या पार्श्वभूमीवर आजपासून आठवडाभर सर्व शाळा बंद ठेवण्यात येणार आहेत.

श्रीलंकन नागरिक सध्या भीषण वीज संकटाचा सामना करत आहेत. पुरेसा वीजपुरवठा नसल्यामुळे नागरिकांना लोडशेडींगला सामोरं जावं लागत आहे. इंधन संकटामुळे श्रीलंकेनं 04 जुलैपासून शाळा एका आठवड्यासाठी बंद ठेवण्याचा निर्णय घेतला आहे. दरम्यान, सरकारी आणि राज्य-मान्यताप्राप्त खाजगी शाळा आठवडाभर बंद राहतील, अशी माहिती शिक्षण विभागानं दिली आहे.

श्रीलंकेच्या मंत्र्यांनी सांगितलं, 'शाळा बंद असल्याच्या कालावधीतील अभ्यासक्रमाचा समावेश पुढील अभ्यासक्रमात करण्यात येईल. गेल्या महिन्यातही इंधनाअभावी ग्रामीण भागातील शाळा एक दिवसासाठी बंद ठेवण्यात आल्या होत्या. तर गेल्या दोन आठवड्यांपासून देशभरातील शहरी भागात शाळा बंद ठेवण्यात आल्या आहेत

दरम्यान, देशाच्या शिक्षण मंत्रालयाचे सचिव निहाल रणसिंघे यांनी शाळांना ऑनलाइन वर्ग घेण्यास सांगितलं आहे. दरम्यान, विभागीय स्तरावर शाळांना कमी विद्यार्थ्यांसह वर्ग चालवण्याची परवानगी देण्यात आली आहे, जेणेकरून वाहतुकीच्या अडचणींचा विद्यार्थी, शिक्षक आणि मुख्याध्यापकांवर परिणाम होणार नाही.