तैपेई : फिलिपिन्समध्ये मोठे नुकसान करणाऱ्या गेईमी वादळाने तैवानला धडक दिली असून येथे मुसळधार पाऊस कोसळत आहे. पावसामुळे अनेक सखल भागांमध्ये पाणी साचल्याने दैनंदिन जीवन विस्कळित झाले आहे. वादळामुळे तैवानमध्ये तीन जणांचा मृत्यू झाला आहे.

गेईमी चक्रीवादळाने दोन दिवसांपूर्वी फिलिपिन्सला धडक दिली होती. पावसामुळे या देशात नद्यांना पूर येऊन अनेक घरांचे नुकसान झाले असून किमान २२ जणांचा मृत्यू झाला आहे. या देशात मोठी हानी घडविणाऱ्या वादळाने आज तैवानला धडक दिली.

वादळाची पूर्वकल्पना असल्याने तैवानमध्ये शाळा, कार्यालये यांना सुटी जाहीर करण्यात आली होती. वादळाने धडक दिल्यानंतर पावसाचा जोर वाढून अनेक सखल भागांमध्ये पाणी साचले. वादळाशी संबंधित घटनांमध्ये तीन जणांचा मृत्यू झाला असून २२० जण जखमी झाले आहेत.

तैवानला अनेकदा वादळांचा सामना करावा लागतो. त्यामुळे या देशाने त्यांची इशारा यंत्रणा सक्षम केली आहे. मात्र, या देशाचे भौगोलिक स्थान, मोठी लोकसंख्या आणि हाय-टेक अर्थव्यवस्था पाहता वादळामुळे नेहमीच मोठे नुकसान होते.