Taiwan News: तैवानच्या संसदेत सादर केलेल्या एका विधेयकावरून सभागृहात खासदारांमध्ये तुफान हाणामारी झाली. सरकारी कामकाजावर लक्ष ठेवण्यासाठी विरोधी पक्षाच्या खासदारांना जास्त अधिकार देण्याचा प्रस्ताव या विधेयकात आहे. नवे अध्यक्ष लाय चिंग ते यांच्या शपथविधीपूर्वीच्या दोन दिवस आधी येथील सभागृहात तुफान हाणामारी झाली. त्याचे व्हिडिओही व्हायरल झाले आहेत.

काही खासदार संसद अध्यक्षांच्या खुर्चीवरही चढले. एकमेकांना ओढून मारहाणही करीत होते. त्याचवेळी एक खासदार एका विधेयकाच्या दस्तावेज घेऊन पळून जाताना व्हिडिओत दिसत आहे. सरकारच्या कामकाजावर लक्ष ठेवण्यासह संसदेत खोटी विधाने केल्यास सरकारी अधिकाऱ्यांवर फौजदारी गुन्हे दाखल केले जातील, असे या विधेयकात नमूद केले आहे. (Taiwan Parliament Viral Video)

विधेयकावरील मतदानापूर्वी नवनिर्वाचित अध्यक्ष चिंग ते यांच्या डेमोक्रॅटिक प्रोग्रेसिव्ह पार्टी (डीपीपी) आणि चीन समर्थक विरोधी पक्ष की कुमेतांग पार्टीच्या (केएमटी) सदस्यांमध्ये हाणामारी झाली. चिंग ते यांचा काही दिवसांपूर्वी झालेल्या निवडणुकीमध्ये विजय झाला. ते लवकरच पदाची शपथ घेणार आहेत. ते चीन विरोधी असल्याचं बोललं जातं.

मिळालेल्या माहितीनुसार, जखमींना हॉस्पिटलमध्ये दाखल करण्यात आले आहे. पाच जणांना जखमा झाल्या आहेत. त्यांच्यावर उपचार सुरू आहेत. यामध्ये डीपीपी आणि केएमटी या दोन्ही पक्षाच्या नेत्यांचा समावेश आहे. संसदेत विधेयकावर चर्चा सुरू असताना हा प्रकार घडला. खासदारांनी एकमेकांना शिवीगाळ आणि मारहाण केली आहे. विधेयकावरून गेल्या काही दिवसांपासून संसदेत खदखद निर्माण झाली. संसदेबाहेर देखील लोकांनी आंदोलन केले होते.

संसदेत पाहायला मिळाला हा राडा अभूतपूर्व होता. यासंदर्भातील व्हिडिओ सोशल मीडियावर व्हायरल होत आहे. अनेकजण यावर प्रतिक्रिया देत आहे. सदर गोंधळासाठी काहींनी चीन समर्थक केएमटी पक्षाला जबाबदार धरलं आहे. सुरक्षा कर्मचाऱ्यांनी हस्तक्षेप केल्यानंतर वाद तूर्तास निवळला आहे.