वॉशिंग्टन : जागतिक प्रतिष्ठेचा पुलित्झर हा पुरस्कार जिंकलेले भारतीय छायाचित्र पत्रकार दानिश सिद्दिकी यांचा अफगाणिस्तानामधील हिंसेचं वृत्तांकन करताना मृत्यू झाला होता. त्यांची हत्या कशी झाली, याबाबत कोणतीही ठोस माहिती उपलब्ध झाली नव्हती. नेमक्या कोणत्या गोळीबारात ते मृत्यूमुखी पडले, याबाबत स्पष्टता नव्हती. मात्र, आता त्यांच्या मृत्यूबद्दल महत्त्वाचा दावा अमेरिकेच्या एका मासिकाने केला आहे.

छायाचित्रकार दानिश सिद्दीकी यांच्या हत्येबाबत मोठा दावा करण्यात आलेल्या या दाव्यात म्हटलंय की, दानिश सिद्दीकीला तालिबानी दहशतवाद्यांनी आधी जिवंत पकडलं होतं. त्यानंतर, दानिश सिद्दीकीची ओळख पटवली आणि त्यानंतर तालिबान्यांनी दानिश यांची निर्घृणपणे हत्या करण्यात आली. थोडक्यात, त्यांचा मृत्यू गाोळीबारात झआला नसून त्यांची ओळख पटवून निर्घृणपणे हत्या करण्यात आली आहे, असं ‘वॉशिंग्टन एक्झामिनर’ या मासिकाने म्हटलंय. गुरुवारी प्रसिद्ध केलेल्या एका रिपोर्टमध्ये त्यांनी हा दावा केला आहे.

सिद्दीकी हे अफगाणिस्तानमध्ये सुरु असलेला हिंसक संघर्षाचे छायचित्रण करण्यासाठी गेले होते. कंदहार शहरामध्ये स्पिन बोल्दाक भागात अफगाणी फौजा व तालिबान यांच्यातील संघर्षाचं छायाचित्रण करताना त्यांचा मृत्यू झाला होता.

काय आहे नेमका दावा?

तालिबानने त्याला पकडले तेव्हा सिद्दीकी जिवंत होते, असा मोठा दावा या रिपोर्टमध्ये करण्यात आलाय. तालिबानने सिद्दीकीची ओळख पटवली केली आणि नंतर त्याची आणि त्याच्या साथीदारांची हत्या केली. पुढे या अहवालात म्हटलंय की, हल्ल्याच्या वेळी सिद्दीकीला गोळी लागली म्हणून तो आणि त्याची टीम स्थानिक मशिदीत गेली, तिथे त्यांना प्राथमिक उपचार मिळाले. मात्र, मशिदीत एक पत्रकार असल्याची बातमी पसरताच तालिबान्यांनी त्यांच्यावर हल्ला केला. सिद्दीकीच्या उपस्थितीमुळे तालिबान्यांनी मशिदीवर हल्ला केल्याचं स्थानिक तपासात उघड झालंय.