बीजिंग - तालिबान संघटनेच्या (Taliban Organisation) एका गटाने आज चीनचे परराष्ट्र मंत्री वँग यी (Wang Yi) यांची तिआनजीन येथे भेट (Meet) घेतली. मुल्ला अब्दुल घनी बरादर याच्या नेतृत्वाखालील या गटाने, अफगाणिस्तानच्या भूमीचा वापर कोणालाही करू दिला जाणार नाही, असे आश्‍वासन चीनला दिले. बरादर याने चीनला ‘विश्‍वासू मित्र’ असेही संबोधले आहे. (Taliban Group Met Wang Yi)

अफगाणिस्तानमधून अमेरिकेची सैन्यमाघारी होत असताना चीन आणि अफगाणिस्तानची जवळीक वाढत आहे. अफगाणिस्तान सरकारमध्ये पुढील काळात तालिबानचे वर्चस्व असणार हे स्पष्ट असून आताही देशातील निम्म्याहून अधिक जिल्हे त्यांच्याच ताब्यात आहेत. या पार्श्वभूमीवर तालिबानी गटाचा हा चीन दौरा झाला आहे. तालिबानच्या अफगाणिस्तानमधील आक्रमक वाटचालीबद्दल चीनला चिंता आहे.

चीनमधील शिनजिआंग प्रांतात उइगर मुस्लिमांमध्ये सरकारबद्दल असंतोष आहे. या समुदायातील ईस्ट तुर्कमेनिस्तान इस्लामिक मूव्हमेंट (ईटीआयएम) फुटीरतावादी गट अफगाणिस्तानला लागून असलेली सीमा ओलांडण्याची शक्यता चीनने व्यक्त केली आहे. मात्र, अफगाणिस्तानच्या भूमीचा इतरांना वापर करू दिला जाणार नाही, असे आश्‍वासन तालिबानने वँग यी यांना दिले आहे. पाकिस्तानचे परराष्ट्र मंत्री शाह महंमद कुरेशी यांनी तीन दिवसांपूर्वी वँग यी यांची भेट घेत, अफगाणिस्तानमधील दहशतवाद्यांविरोधात संयुक्त कारवाई करण्याची घोषणा केली होती.

आजच्या भेटीवेळी वँग यी यांनी, तालिबानने ‘ईटीआयएम’पासून दूर रहावे, त्यांना मदत करू नये, अशी अपेक्षा व्यक्त केली. संयुक्त राष्ट्रांच्या एका अहवालानुसार, ‘ईटीआयएम’चे शेकडो सदस्य अफगाणिस्तान सीमेवर जमा झाले आहेत. यी यांची मागणी तालिबानने मान्य केली.