तालिबानने अफगाणिस्तानवर ताबा मिळवल्यानंतर तिथे अराजक माजलं आहे. काबूल विमानतळावर बॉम्बस्फोटात 70 हून अधिक जणांचा मृत्यू झाला आहे. दरम्यान, आता तालिबानचा प्रमुख नेता असलेल्या शहाबुद्दीन दिलावरने मोदींच्या वक्तव्यावर प्रतिक्रिया दिली आहे. दहशतीच्या बळावर स्थापन केलेली सत्ता कायम स्वरुपी नसते असं वक्तव्य मोदींनी केलं होतं. ते आव्हान म्हणून स्वीकारून सत्ता टिकवून दाखवू असं दिलावरने म्हटलं आहे. तसंच अफगाणिस्तानात योग्य पद्धतीनं सरकार चालवत असल्याचं लवकरच भारताला दिसेल असंही दिलावरने म्हटलं.

पतंप्रधान नरेंद्र मोदी यांनी सोमनाथ मंदिर प्रकल्पांचे उद्घाटनाच्या कार्यक्रमावेळी दहशतवादाच्या माध्यमातून सत्ता मिळवण्यावर भाष्य केलं होतं. यात त्यांनी तालिबानचा उल्लेख न करता इशारा दिला होता. यावरूनच तालिबानच्या प्रमुख नेत्यानं रेडिओ पाकिस्तानला दिलेल्या मुलाखतीतून प्रतिक्रिया दिलीय. यात म्हटलंय की, भारतानं अफगाणिस्तानच्या अंतर्गत बाबींमध्ये नाक खुपसू नये. तसंच पाकिस्तान हे मित्रराष्ट्र असून 30 लाखांहून अधिक अफगाण नागरिकांना आश्रय दिला त्याबद्दल त्यांचे आभार. याशिवाय जगातील प्रत्येक देशाशी शांततेचे आणि सामंजस्याचे संबंध ठेवण्याची इच्छाही दिलावरने व्यक्त केली.

जगभरातील अनेक देशांनी अफगाणिस्तानबाबत वेट अँड वॉचची भूमिका घेतली आहे. भारतही याला अपवाद नाही. तालिबानने अफगाणिस्तान ताब्यात घेतल्यानंतर तिथली परिस्थिती गंभीर असल्याचं मत भारताचे परराष्ट्र मंत्री एस जयशंकर यांनी सर्वपक्षीय बैठकीत व्यक्त केलं. तसंच भारताने सध्या घेतलेल्या भूमिकेला सर्वपक्षीय नेत्यांनी पाठिंबा दर्शवला आहे. सध्या अफगाणिस्तानात अडकलेल्या भारतीयांना सुखरुप मायदेशी आणणे यालाच प्राधान्य दिले जाईल असं केंद्र सरकारने स्पष्ट केलं आहे.