काबुल विमानतळावर गुरुवारी आत्मघाती हल्ला झाला. यामध्ये 70 हून अधिक जणांचा मृत्यू झाला असून यात अमेरिकेच्या 12 सैनिकांचा समावेश आहे. इस्लामिक स्टेट खुरासान प्रांतने या हल्ल्याची जबाबदारी स्वीकारली आहे. आत्मघाती हल्ल्यात आपला हात असल्याचे सांगताना त्यांनी हल्लेखोराचा फोटोही जारी केला आहे. IS ने असा दावा केला की, हल्ल्यात 160 अमेरिकन सैनिक आणि त्यांचे सहकारी मारले गेले. तसंच अनेकजण जखमी झाले आहेत. दरम्यान, या हल्ल्यानंतर अफगाणिस्तानचे काळजीवाहून राष्ट्रपती अमरुल्ला सालेह यांनी एक ट्विट केलं आहे. यामध्ये तालिबानींनी त्यांच्या मास्टरकडून चांगले शिक्षण घेतले आहे असं म्हटलं आहे.

अमरुल्ला सालेह म्हणाले की, तालिबानी मास्टरकडून चांगले शिकलेत. पाकिस्तानचे क्वेट्टा शुरावेळी असलेले संबंध फेटाळले तसे तालिबानने आता इसिसशी संबंध नाकारले आहेत. हातात असलेला प्रत्येक पुरावा हा IS-K ची पाळेमुळे ही तालिबान आणि हक्कानी नेटवर्कमध्ये असल्याचं दाखवतं.

अमरुल्ला सालेह यांनी याआधी तालिबानला विरोध सुरुच राहणार असल्याचं म्हटलं होतं. अफगाणिस्तानचे सरकार म्हणून तालिबानला कधीच मान्यता देणार नाही. अहमद मसूद यांच्या नेतृत्वाखाली इतर बाबींवर चर्चेसाठी तयार आहे. मात्र शरणागती पत्करणार नाही असेही त्यांनी सांगितलं होतं.

अमेरिकेने त्यांच्या सैनिकांचा या हल्ल्यात मृत्यू झाल्यानंतर तालिबानला इशारा दिला आहे. तालिबानला याची किंमत मोजावी लागेल आणि आम्ही तुम्हाला शोधून मारू असंही अमेरिकेचे राष्ट्राध्यक्ष ज्यो बायडेन यांनी म्हटलं आहे. अफगाणिस्तानमध्ये दहशतवादी हल्ल्यात ठार झालेल्या सैनिकांना श्रद्धांजली वाहण्यात आली असून 30 ऑगस्टपर्यंत अमेरिकेचा झेंडा अर्ध्यावर फडकणार आहे.