भारतात टेस्ला (Tesla) गाड्या कधी दाखल होतील आणि रस्ते कधी तुडुंब भरलेले दिसतील, हे आत्ताच सांगणं फार कठीण आहे. दरम्यान, टेस्लाच्या भारतात (Tesla India) प्रवेशासाठी कंपनीच्या वतीनं प्रयत्न करणार्‍या टेस्लाच्या एका प्रमुख कार्यकारी अधिकाऱ्यानं आपल्या पदाचा राजीनामा दिल्याची बातमी समोर येत आहे. या प्रकरणाशी संबंधित दोन लोकांनी 'रॉयटर्स' या वृत्तसंस्थेला ही माहिती दिलीय.

टेस्लाच्या सर्वोच्च पदाचा राजीनामा दिलेल्या अधिकाऱ्याचं नाव मनुज खुराना (Manuj Khurana) असल्याचं सांगण्यात येतंय. अहवालानुसार, काही काळापूर्वी टेस्लानं भारतात आपल्या इलेक्ट्रिक कारची विक्री सुरू करण्याची योजना पुढं ढकलली होती. त्यानंतरच मनुजनं कंपनीकडं आपला राजीनामा सुपूर्द केलाय.

मनुज खुराना हे भारतातील टेस्लाचं धोरण आणि व्यवसाय विकास कार्यकारी (Policy and Business Development Executive) म्हणून काम करत होते. खुराना हे मार्च 2021 पासून Elon Musk च्या टेस्ला कंपनीशी संबंधित आहेत. यादरम्यान त्यांनी टेस्लाच्या इलेक्ट्रिक कारला भारतात प्रवेश मिळवून देण्यासाठी प्रचंड प्रयत्न केले. खुराना यांनी भारत सरकारला टेस्ला वाहनांवरील आयात शुल्क 100 टक्क्यांवरून 40 टक्क्यांपर्यंत कमी करण्यास सांगण्यासाठी सर्वतोपरी प्रयत्न केले आहेत.