कोणत्याही गोष्टीचा मोह कधी करु नये असं कायमच म्हटलं जातं. मोहापायी अनेकांना मोठ्या संकटांचा सामनादेखील करावा लागला आहे. असाच काहीसा प्रकार थायलँडमध्ये घडला आहे. चोरी करण्याच्या उद्देशाने गेलेला एक चोर त्याच्या मोहापायी पोलिसांच्या जाळ्यात अडकला आहे. विशेष म्हणजे हा चोर पैसा, दागदागिने या कशाचाही मोह न करता एका वेगळ्याच मोहात पडला आणि याच कारणामुळे त्याच्या हातात पोलिसांच्या बेड्या पडल्या आहेत. त्यामुळे सध्या या घटनेची सोशल मीडियावर चर्चा रंगली आहे.

थायलँडमध्ये हा प्रकार घडला असून चोरी करायला गेलेला एक चोर चक्क चोरी केल्यानंतर त्याच घरात झोपी गेला. त्याच्या याच चुकीमुळे त्याला पोलिसांनी अटक केली आहे.

हेही वाचा : फ्रीज स्वच्छ करताना अडचण येतेय? वापरा सोप्प्या टीप्स

२२ वर्षीय चोराने घरात चोरी केल्यानंतर तो निघण्याच्या तयारी होता. मात्र, त्यापूर्वी घरातील एसी आणि बेड पाहून त्याला झोपेचा मोह आवरला नाही. त्यामुळे तो तेथेच झोपला. पहाटे या घराचे मालक आल्यानंतर त्यांनी चोराला झोपलेल्या अवस्थेत पाहिलं आणि त्यात क्षणी या चोराची चोरी पकडली गेली.

सूत्रांच्या माहितीनुसार, हा चोर घरातील एका बेडरुममध्ये झोपला होता. ही बेडरुम घरमालकांच्या मुलीची होती. सकाळी या घर मालकांनी पाहिलं तर त्यांच्या मुलीच्या बेडरुमचा एसी सुरु होता. विशेष म्हणजे त्यांची मुलगी घरी नसतांनादेखील एसी सुरु कसा काय हा प्रश्न घर मालकांना पडला. त्यामुळे त्यांनी मुलीच्या बेडरुममध्ये डोकावून पाहिलं तर, हा चोर चक्क तिच्या बेडरुममध्ये झोपला होता. त्यानंतर या चोराला अटक करण्यात आली.