काबूल- अफगाणिस्तानमधील (Afghanistan) स्थिती दिवसेंदिवस चिघळत आहे. तालिबान्यांच्या अत्याचाराविरोधात अफगान सैन्य संघर्ष करतंय. देशात लोकशाही सरकार टिकवून ठेवण्यासाठी अफगान सैन्य प्रयत्न करत आहे. तालिबान्यांच्या हिंसाचारामुळे आतापर्यंत 60 हजारांपेक्षा अधिक कुटुंब बेघर झाले आहेत. आपल्याच देशात नागरिकांना सुरक्षित घराच्या शोधात भटकंती करावी लागत आहे. यातच अफगान सैन्यातील युवा जनरल सामी सादात (Afghan general, Sami Sadat) नागरिकांसाठी एक आशेचा किरण बनले आहेत. 36 वर्षाचे सामी तालिबान्यांचा सर्व पातळ्यांवर सामना करत आहेत. (International Latest News)

तालिबान्यांनी अनेक प्रांत आपल्या ताब्यात घेतले आहेत. असे असले तरी अफगान सैन्य निकराचा लढा देत आहेत. तालिबानी दहशतवादी अफगान सैन्य शरणागती पत्करत असतानचे फोटो ट्विटरवर शेअर करत आहे. तालिबानी बळकावलेल्या भूभागाचे फोटो शेअर करताहेत. दुसरीकडे सामी सादात ट्विटर व्यासपीठाचा वापर करत लोकांचे मनोधैर्य वाढवत आहेत. सामी 215 व्या कॉर्प्सचे कमांडर आहेत. त्यांच्या कॉर्प्समध्ये 20 हजार सैनिकांचा समावेश आहे. सामी सादात ट्विटरवर सक्रिय आहेत. त्यांचे अनेक फॉलोवर्स आहेत. ते स्थानिक लोकांसोबतचे फोटो शेअर करत असतात. स्थानिक दुकानदारांची भेट घेत असतात. बुधवारी अफगान सैन्याने ट्विट करुन माहिती दिलीये की, त्यांना प्रमोट करण्यात आलं आहे. ते आता देशाच्या स्पेशल फोर्सचे नेतृत्व करतील.

तालिबान दहशतवाद्यांना हरवणारच

तालिबान्यांनी मोठ्या भूभागावर ताबा मिळवला असला तरी, सादात यांनी हिंमत गमावलेली नाही. ते म्हणतात की, 'मला विश्वास आहे की शेवटी विजय आमचाच होईल. हा आमदा देश आहे. तालिबान अपयशी ठरत आहे आणि ते लवकरच पळून जातील.' सादात यांनी अफगाणिस्तानच्या हेरगिरी एजेन्सीमध्येही काम केले आहे. त्यांच्या एका सहकार्याच्या म्हणण्यानुसार, ते रणनीती आखण्यात तरबेज आहेत आणि कोणत्याही घटनेचे ते योग्य विश्लेषण करु शकतात.

सादात आहेत उच्चशिक्षित

सादात यांनी लंडनच्या किंग्स कॉलेजमधून पदवी घेतली आहे. त्यांनी आपल्या लष्करी करिअरची सुरुवात अफगाणिस्तानच्या गृह मंत्रालयातून केली होती. त्यांनी जर्मनी, ब्रिटेन, पोलंड आणि अमेरिका येथे ट्रेनिंग घेतली आहे. त्यांनी हेरगिरी विभागात काम केलंय. सादात यांनी तालिबान्यांना हरवण्याचा निर्धार केला आहे. त्यांनी म्हटलंय की, लष्कर गाहमध्ये येणारा प्रत्येक तालिबानी दहशतवाद्याचा खात्मा करण्यात येईल किंवा त्यांना आयुष्यभर अपंग म्हणून राहावं लागेल. दरम्यान, सादात आणि त्यांचा परिवार दहशतवाद्यांच्या निशाण्यावर आहे.