लंडन : भारतीय वंशाचे ऋषी सुनक युकेचे पंतप्रधान होण्याच्या शर्यतीत आहेत. सुनक आणि लिझ ट्रस (Liz Truss) यांच्यात अंतिम सामना सुरूय. दरम्यान, युनायटेड किंगडमच्या पुढील पंतप्रधानपदाच्या शर्यतीत असलेल्या सुनक (Rishi Sunak) यांचं व्हिडिओ कॅम्पेनमध्ये 'अंडरडॉग' म्हणून वर्णन करण्यात आलंय.

बोरिस जॉन्सनचा (Boris Johnson) उत्तराधिकारी म्हणून ऋषी सुनक यांच्याकडं पाहिलं जातंय. सनक यांची मोहीम टीम लिझ ट्रस विरुद्ध त्यांच्या 'अंडरडॉग' प्रतिमेचा फायदा घेण्याचा प्रयत्न करत आहे. याच क्रमानं हा नवा कॅम्पेन व्हिडिओ रिलीज करण्यात आलाय.

ऋषी सुनक यांच्या प्रचाराच्या व्हिडिओ कॅप्शनमध्ये लिहिलंय, 'माझ्याकडं गमावण्यासारखं काहीच नाही. पण, मी शेवटपर्यंत लढणार आहे.' ब्रिटनच्या नव्या पंतप्रधानांच्या नावाची घोषणा 5 सप्टेंबरला होणार आहे. पहिले 8 उमेदवार पंतप्रधानपदाच्या शर्यतीत होते. खासदारांच्या मतदानाच्या पाच फेऱ्यांनंतर भारतीय वंशाचे ब्रिटिश नागरिक ऋषी सुनक यांच्याशिवाय लिझ ट्रस पंतप्रधानपदाच्या शर्यतीत उरले आहेत.

बोरिस जॉन्सन ऑक्टोबरमध्ये पद सोडणार आहेत. त्याआधी नव्या पंतप्रधानांची घोषणा होणार आहे. ट्रस आणि सुनक यांच्यामध्ये कोण जिंकणार याबाबत वेगवेगळे दावे केले जात आहेत. मात्र, कोण पंतप्रधान पदाचा दावेदार होणार हे 5 सप्टेंबरला कळणार आहे. सध्या लिझ ट्रस पदाच्या दावेदार असल्यातरी ऋषी सुनक यांनी देखील मतं मिळवण्यात चांगलीच मुसंडी मारलीय.