किव्ह : ‘रशियाविरोधातील युद्धात युक्रेनचा विजय होणे आवश्‍यक आहे. आम्ही युक्रेनच्या नागरिकांच्या पाठिमागे ठाम आहोत,’ असे फ्रान्सचे अध्यक्ष इमॅन्युएल मॅक्रॉन यांनी आज सांगितले. मॅक्रॉन यांच्यासह आज जर्मनी, रोमानिया आणि इटलीच्या प्रमुखांनी युक्रेनचा दौरा केला. यावेळी त्यांनी युद्धात झालेल्या नुकसानीची पाहणी केली. युक्रेनी अधिकाऱ्यांनी त्यांना रशियाने केलेल्या हल्ल्यांची आणि अत्याचारांची माहिती दिली. यानंतर पत्रकारांशी बोलताना मॅक्रॉन म्हणाले की,‘‘आम्ही पहिल्या दिवसापासून युक्रेनच्या पाठिशी आहोत. रशियाने येथील ऐतिहासिक शहरांमध्ये अनन्वित अत्याचार केले आहेत.’’ मॅक्रॉन यांनी केलेले आरोप रशियाने फेटाळले आहेत.

युद्धात युक्रेनला पाठिंबा व्यक्त करण्यासाठी फ्रान्सचे अध्यक्ष मॅक्रॉन, जर्मनीचे चॅन्सलर ओलाफ शोल्झ, इटलीचे पंतप्रधान मारिओ द्राघी आणि रोमानियाचे अध्यक्ष क्लॉस योहानिस यांनी किव्हला भेट दिली.

युद्धाच्या आघाडीवर

• ब्रिटनचे रशियावर नवे निर्बंध जारी

• नाटो देशांनी पाठविलेला शस्त्रसाठा क्षेपणास्त्रांनी उडवून लावल्याचा रशियाचा दावा

• पाश्‍चात्य देशांनी युक्रेनला शस्त्र पुरवठा करण्यावरच लक्ष केंद्रीत करू नये : रशिया

• रशियाने इशारा देऊनही अमेरिका आणि जर्मनी युक्रेनला शस्त्रे पाठविणार