किव : युक्रेनमध्ये रशियाकडून जोरदार हल्ला सुरु आहे. रशियाने (Russia) त्यांचे रणगाडेही युक्रेनमध्ये (Ukraine) घुसवले असून मोठ्या प्रमाणावर हल्ले केले जात आहेत. यातच आता एक व्हिडिओ सोशल मीडियावर व्हायरल होत आहे. रशियन रणगाडा थेट एका युक्रेन नागरिकाच्या कारवर घातल्याचा हा व्हिडिओ आहे. विशेष म्हणजे रणगाडा कारवर चढवल्यानंतरही कारमधील व्यक्ती आश्चर्यकारकरित्या त्यातून बचावली आहे.

घटनेचे अनेक व्हिडिओ सोशल मीडियावर व्हायरल होत असून त्यात रणगाडा गेल्यानंतर अडकलेला व्यक्ती कारमध्ये बसल्याचं दिसून येतं. व्हिडिओमध्ये ती व्यक्ती जिवंत असल्याचं दिसत असलं तरी त्यांना किती गंभीर जखम झालीय किंवा त्याबाबतची काही माहिती मिळू शकली नाही.

रशियाकडून सुरु असलेल्या आक्रमणाला तोंड देण्यासाठी युक्रेनच्या नागरिकांनी शस्त्र हाती घेतले आहे. यात काही असेही लोक आहेत ज्यांनी आय़ुष्यात कधीच शस्त्रांना हात लावला नाही. मात्र तरीही देशासाठी ते सैन्यात दाखल झाले आहेत. देशाच्या संरक्षणासाठी घरच्या लोकांना सोडून जात असलेले अनेक व्हिडिओ सोशल मीडियावर सध्या व्हायरल होत आहेत. युक्रेनच्या लष्कराने १८ ते ६० वर्षे वयोगटातील कुणाही बंदूक घेऊन लढण्यासाठी तयार व्हावं असं आवाहन केलं होतं. आतापर्यंत १ हजार रशियान सैनिक मारल्याचा दावा युक्रेनने केला आहे. तर रशियाकडून याबाबत कोणतीही आकडेवारी जाहीर करण्यात आलेली नाही.

चर्नोबिलमधून किरणोत्सर्गात वाढ

युक्रेनमधील चेर्नोबिल अणुभट्टीवर रशियाच्या सैनिकांनी काल (ता. २४) ताबा मिळविल्यानंतर आता या अणुभट्टीतून गॅमा किरणांच्या उत्सर्जनाचे प्रमाण वाढले असल्याचे युक्रेनच्या अणुऊर्जा नियंत्रण संस्थेने म्हटले आहे. हल्ल्यादरम्यान या अणुभट्टीच्या आजूबाजूला स्फोट झाल्याने आणि नंतरही या परिसरात जड वाहनांची मोठ्या प्रमाणावर ये-जा झाल्याने उत्सर्जनावर परिणाम झाला असल्याचा अंदाज तज्ज्ञांनी व्यक्त केला आहे. आमचे हवाई दल या प्रकल्पाचे संरक्षण करत असल्याचा दावा रशियाने केला आहे.