काबुल: अफगाणिस्तानातील काबुल विमानतळावरुन लष्करी विमानांची उड्डाण (Military flight) सुरु झाली आहेत. अफगाणिस्तानात तालिबान (Afganistan taliban) राज येणार असल्याचे स्पष्ट झाल्यानंतर हजारो अफगाणी नागरिक (Afgan national) काल काबूल विमानतळावर (Kabul airport) दाखल झाले. काबुलच्या धावपट्टीवर हजारोंचा जमाव जमला होता. काहीही करुन विमानात जागा मिळवण्यासाठी त्यांची धडपड सुरु होती.

या गोंधळामध्ये विमानतळ परिसरात गोळीबाराच्याही घटना घडल्या. आता धावपट्टी रिकामी करण्यात आली असून तिथून विमानांची उड्डाण सुरु झाली आहेत. विविध देश अफगाणिस्तानात अडकलेले राजनैतिक अधिकारी आणि नागरिकांची सुटका करत आहेत. आज सकाळी इंडियन एअर फोर्सच्या C-17 ग्लोबमास्टर विमानाने १२० भारतीयांना घेऊन काबुल विमानतळावरुन उड्डाण केले.

दुपारपर्यंत हे विमान मायदेशी दाखल होईल. C-17 ग्लोबमास्टरचे हे दुसरे उड्डाण आहे. १२० पेक्षा जास्त भारतीय अधिकारी या विमानामध्ये आहेत. काबुल विमानतळावरील सुरक्षेची जबाबदारी अमेरिकेने घेतली असून अमेरिकन फौजांच्या देखरेखीखाली तिथे हवाई उड्डाण सुरु झाली आहेत. अफगाणिस्तानच्या वेगवेगळ्या भागात अडकलेल्या कर्मचाऱ्यांना काबूल येथे आणले जात आहे. अफगाणिस्तानातील परिस्थिती लक्षात घेऊन तिथले आपले राजदूत आणि सर्व कर्मचाऱ्यांना माघारी बोलवण्याचा निर्णय घेण्यात आलाय असे परराष्ट्र मंत्रालयाचे प्रवक्ते अरिंदम बागची म्हणाले.