तिरोडा (जि. गोंदिया): घरगुती विहिरीतील विषारी वायूमुळे गुदमरून चार जणांचा मृत्यू झाला. ही दुर्दैवी घटना तालुक्यातील सरांडी येथे बुधवारी (ता. २८) सकाळी नऊच्या सुमारास घडली.

खेमराज गिरधारी साठवणे (वय ४४), प्रकाश सदाशिव भोंगाडे (४०), सचिन यशवंत भोंगाडे (२८), महेंद्र सुखराम राऊत (३४, सर्व रा. सरांडी) अशी मृतांची नावे आहेत. या घटनेने गावावर शोककळा पसरली आहे.

खेमराज साठवणे हे सकाळी घराच्या मागील भागात असलेल्या घरच्या विहिरीत बंद पडलेली मोटर काढण्याकरिता उतरले होते. १५ ते २० मिनिटे होऊनही ते विहिरीबाहेर आले नाही.

त्यामुळे खेमराजचा भाऊ प्रल्हाद हा शेजारच्यांना बोलवायला गेला. शेजारी राहणारे सचिन भोंगाडे खेमराजला शोधण्यासाठी विहिरीत उतरला. तो विहिरीत उतरत असताना काही अंतरानंतर खाली पडला.

हे बघून त्याला वाचविण्याकरिता सचिनचा काका प्रकाश भोंगाडे व महेंद्र राऊत हेदेखील विहिरीत उतरले. मात्र, तेदेखील विहिरीत खाली पडले. दरम्यान, त्यांना वाचवण्यासाठी लक्ष्मण लिल्हारे हे मोटारीचा वीजपुरवठा बंद करून विहिरीत उतरले.

पण आत श्वास गुदमरत असल्याचे लक्षात येताच ते परत वर आले. त्यामुळे त्यांचे प्राण वाचले.

विहिरीत विषारी वायू आहे का, हे तपासण्यासाठी काही जणांनी कोंबडीचे पिल्लू दोरीने बांधून विहिरीत सोडले असता ते पिल्लू देखील मरण पावले. त्यामुळे चारही जणांचा विषारी वायूमुळेच मृत्यू झाला, हे स्पष्ट झाले.

प्रशासनाने चौघांचेही मृतदेह बाहेर काढून शवविच्छेदनासाठी उपजिल्हा रुग्णालयात हलविले. या घटनेने सरांडी गावावर शोककळा पसरली आहे. उल्लेखनीय म्हणजे, यापूर्वीसुद्धा सरांडी येथील भुरे यांच्या घरी असलेल्या विहिरीत विषारी वायुमुळे दोन जणांचा मृत्यू झाला होता.