'दही' (Curd) आरोग्यासाठी खूप चांगलंय. हे एक उत्तम प्रोबायोटिक मानलं जातं. प्रोबायोटिक्स (Probiotics) आपल्या अन्ननलिकेत चांगले बॅक्टेरिया (Bacteria) वाढवतात, त्यामुळं आपली पचनक्रिया चांगली राहते. उन्हाळ्यात दही, ताक, लस्सी हे सगळेच जण पितात. परंतु, हिवाळ्यात दही नुकसान करतं, असा अनेकांचा समज असला तरी, त्यामुळं खोकला आणि घसा दुखू शकतो. ज्यांना दही आवडतं आणि जेवणासोबत ते नियमितपणे खातात, त्यांच्यासाठी हिवाळ्यात दही सोडणं कठीण असतं. आयुर्वेद (Ayurveda) याबद्दल कोणता सल्ला देतं आणि विज्ञान (Science) काय सांगतं, हे आपण जाणून घेऊ..

आयुर्वेद काय सांगतं?

हिवाळ्यात आलू पराठा, कचोरी, खिचडी असे अनेक पदार्थ आहेत, जे दही किंवा रायत्याशिवाय अपूर्णच वाटतात. बरेच लोक मानतात की, दही खाल्ल्यानं घसा खवखवणं आणि सर्दी होऊ शकते. आयुर्वेदातही हिवाळ्यात दही न खाण्याचा सल्ला दिला जातो. हे आपल्या शरीरात म्यूकस वाढवतं, असं मानलं जातं. ज्यांना आधीच श्वास आणि खोकल्याशी संबंधित समस्या आहेत, त्यांच्या अडचणी वाढू शकतात. म्हणूनच, आयुर्वेदात हिवाळ्यात विशेषतः संध्याकाळी दही खाण्यास मनाई आहे. जर तुम्हाला अशी कोणतीही समस्या असेल, तर तुम्ही संध्याकाळी 5 वाजण्यापूर्वी दही खाऊ शकता.

विज्ञान काय म्हणतं?

विज्ञान म्हणतं, दही हे प्रोबायोटिक आहे, त्यामुळं ते तुमच्या प्रतिकारशक्तीसाठी चांगलंय. यामध्ये कॅल्शियम, व्हिटॅमिन बी 12 आणि फॉस्फरस देखील मुबलक प्रमाणात असतं. हिवाळ्यात आपल्या शरीरात अनेक प्रकारचे संक्रमण लवकर होतात, त्यामुळं रोगप्रतिकारक शक्ती मजबूत ठेवणं देखील आवश्यक आहे. थंड दही न खाणे हाच उत्तम उपाय आहे. तसेच दह्यामुळं घसा खवखवणं, खोकला किंवा सर्दी यांसारख्या समस्या उद्भवल्याचा पूर्वीचा अनुभव असेल तर दही खाऊ नये. काही वेळा दह्याच्या अॅलर्जीमुळं खोकला, घसादुखी अशा तक्रारी होतात.

टीप : या लेखात प्रकाशित केलेली माहिती सामान्य माहिती आणि घरगुती उपचारांवर आधारित आहे. 'ई-सकाळ' याला दुजोरा देत नाही. म्हणून, लक्षणे दिसल्यास दुर्लक्ष करू नका आणि ताबडतोब डॉक्टरांचा सल्ला घ्या.