शारीरिक व्याधींवर मात करायची असेल तर योगासनांचा आधार घेण्याशिवाय पर्याय नाही. योग केल्यामुळे अनेकांच्या शारीरिक व मानसिक समस्या दूर झाल्याचं आपण साऱ्यांनीच ऐकलं आहे. साधारणपणे वयाची ३५ वर्षे ओलांडली की कंबरदुखी, पायदुखी अशा समस्या निर्माण होतात. म्हणूनच योगासनांच्या सरावामध्ये भद्रासन नियमितपणे जरूर करा. (daily-yog-steps-and-health-benefits-of-Bhadrasan )

भद्रासन करण्याचे फायदे

१. मांडीचे स्नायू लवचिक होतात.

२. मांडीजवळील भागांचे स्नायू ताणले जातात.

३. ओटीपोटातील रक्ताभिसरण प्रक्रिया सुरळीत होते.

४. कमरेखालील सांधे मोकळे होतात.

५. या आसनात मांड्या व पोटऱ्यांवर ताण येतो. त्यामुळे मांडी, जांघा आणि पार्श्वभाग यांच्यावर ताण येऊन येथील स्नायू बळकट होतात.

६. भद्रासन ही ध्यानाची बैठक तयार करण्यासाठीचे सर्वात उत्तम आसन आहे.

भद्रासन कसे करावे –

प्रथम जमिनीवर पाय पसरुन बसा. त्यानंतर दोन्ही पाय गुडघ्यात दुमडून एकमेकांना जोडा. दोन्ही पायाचे तळवे एकमेकांना स्पर्श करतील अशा पद्धतीने बसा. त्यानंतर दोन्ही हातांनी पायांचे चवडे पकडून स्वत:च्या दिशेने ओढा. मात्र, यावेळी पाय जमिनीला स्पर्श करतील याची काळजी घ्या. तसंच हे आसन करताना पाठीचा कणादेखील ताठ राहिल याकडे लक्ष द्या.