बाळाची चाहूल लागली की घरात आनंद पसरतो.  गर्भार स्त्रीने काय खावे आणि काय नाही, तिने कसं काम करावं, याबद्दल तिला सल्ले दिले जातात. आहार, विहार आणि औषधोपचार या तीन स्तरांवर गर्भिणींना अधिक काळजी घ्यावी लागते. 

गर्भारपणातील व्यायाम तज्ज्ञ या नात्याने सथ्याच्या काळात घरच्या घरी करता येतील असे व्यायाम मी‌ सुचवत  आहे. या व्यायामाची चित्रफीत सकाळच्या गर्भ केयर या फेसबुक पेजवर उपलब्ध आहे. ती पाहूनच हे व्यायाम करावेत. 

गर्भावस्थेत योग्य पद्धतीने व्यायाम केल्यास खालील फायदे होतात - 

- शारीरिक व मानसिक क्षमता वाढते. गर्भारपणात काळात शरीरमनावर जो ताण येतो तो घालवण्यासाठी व्यायाम उपयुक्त ठरतात. 

- या काळात अपरिहार्य असलेल्या हार्मोनल बदलांपैकी चांगल्या बदलांना उत्तेजन मिळते. 

- पचन चांगले होऊन पोट साफ राहते. त्यामुळे आरोग्य उत्तम राहते. 

- झोप चांगली लागते  उत्साह वाढतो. 

- फिटनेस वाढतो आणि गर्भारपणाच्या ताण सोसण्याची ताकद मिळते. 

- सांध्यांची लवचिकता आणि ताकद वाढते 
व्यायामाचे महत्त्व सांगितल्यावर आता कोणते आणि कसे व्यायाम करावेत,  हे पाहू. 

व्यायामाचे ३ प्रकार आहेत -
उभे व्यायाम, बैठे व्यायाम आणि खाली बसून करायचे व्यायाम. त्यापैकी आपण  उभे राहून करायचे व्यायाम पाहू. या प्रकारात आपण सर्व सांध्यांना व्यायाम घडवतो. यात स्ट्रेचिंग प्रकारचे व्यायाम असतात. त्यामध्ये मानेचे, मनगटाचे, हाताचे , खांद्याचे व्यायाम, 
ट्विस्टिंग आणि दोन्ही बाजूंना वाकण्याचे व्यायाम यांचा समावेश आहे.