आपण गेल्या आठवड्यात सूर्यनमस्कारामधील एका पाठोपाठ करावयाच्या आठ वेगवेगळ्या आसनांची माहिती घेतली. त्यातून मानसिक आणि शरीरात अंतर्गत होत असलेल्या परिणामांची अनुभूतीही आपल्याला जाणवली असेलच.

सूर्यनमस्कार करण्यापूर्वीची पहिली पायरी म्हणजे दोन्ही पाय एकमेकांना जुळवून किंवा त्यामध्ये काही अंतर ठेवून ताठ उभे राहावे. दोन्ही हात शरीरापासून काही अंतरावर कोणताही ताण न देता अधांतरी ठेवणे. शांतपणे डोळे बंद करून संपूर्ण शरीर एकाग्र करावे. शरीर किंचितसे हेलकावे घेत असल्याचे जाणवत असल्यास ते शांत करण्याचा प्रयत्न करा.

संपूर्ण शरीराचे वजन दोन्ही पायांवर एकसारखे ठेवावे. दोन्ही पायांचे तळवे जमिनीला समांतर आहेत, याची खात्री करा. संपूर्ण शरीर गुरुत्वाकर्षणाने खाली खेचले जात असल्याचा, तसेच शरीराचा ताण जमिनीच्या दिशेने जात असल्याचा अनुभव घ्या. त्याच बरोबर आपल्या शरीराच्या संपूर्ण सामर्थ्याचा अनुभवही आपणास येईल. शरीरामध्ये हळूहळू जागरूकता आणून मन शांत करा. डोक्याच्या केसापासून प्रारंभ करत शरीरातील एकएक अवयव ताणापासून शिथिल करायला सुरूवात करा. पूर्ण शरीरातील जागरूकता वाढवत त्याच्याशी सुसंगत असा अनुभव घ्या. त्यानंतर डोक्यावरील केस दोन्ही भुवयांमधील केंद्र, हृदयाचे केंद्र यातून निर्माण होणाऱ्या उपचार शक्तींना चैतन्य देण्याचा प्रयत्न करा.

हे आसन तुम्ही डोळे बंद करून एक मिनीट करू शकता. योगासनाचा सराव वाढल्यावर डोळे बंद करून तासभरही करून त्याचे फायदे अनुभवता येतील. हट सरावाचा हा भाग आहे. ‘स्थिरम् सुखम आसनम्’, अर्थात आसनामध्ये स्थिर आणि आरामदायी राहणे ही प्रथा आहे.

ही काळजी घ्या

• दोन्ही खांदे आरामदायी ठेवा.

• मान ताठ आणि हनुवटी जमिनीला समांतर ठेवा.

• दोन्ही हात बाजूला आरामदायी ठेवा.

• पोटाचा आतील भाग मणक्याच्या दिशेने ओढला जातो.

• टेलबोन काही प्रमाणात ओढला जातो.

• मांडीला काही प्रमाणात ताण मिळतो.

• पायाच्या बोटांत अंतर ठेवून टाचा थोड्या प्रमाणात वर उचलायच्या.

आसनाचे फायदे

• पायांमधील ताकद वाढते.

• खांद्यांचे जोड मजबूत होतात.

• उदर आणि पार्श्‍वभागाचे स्नायू बळकट होतात.

• पाठीचा कणा, गुडघ्याचे स्नायू बळकट होतात.

• शरीराचा तोल सांभाळण्यास उपयुक्त

• शरीर सुडौल राहते.

• सायटिकासारख्या दुखण्यांवर उपयुक्त.