What Is Important To Prevent Infertility and Be Fertile: जीवनशैलीत मोठा बदल झाल्यामुळे वंध्यत्वाचा सामना करणाऱ्या जोडप्यांच्या संख्येत वाढ होत आहे. अनियमित झोप, सततचा तणाव, अवेळी जेवण, व्यायामाचा अभाव आणि बैठे जीवन याचा शरीरावरच नव्हे, तर प्रजनन क्षमतेवर अर्थात फर्टिलिटीवर परिणाम होत आहे.

वंधत्व टाळण्यासाठी वैद्यकीय उपचारासह समतोल आहार, व्यायाम आणि तणावमुक्त राहण्याची गरज आहे, असे मत वंध्यत्व निवारण तज्ज्ञांनी व्यक्त केले. सततच्या तणावामुळे महिलांमध्ये हार्मोन्सचे असंतुलन, अनियमित मासिक पाळीमध्ये अडथळा निर्माण होत आहे.

पुरुषांमध्ये शुक्राणूंची संख्या कमी होणे, गुणवत्ता घसरणे यांसारख्या समस्या वाढल्या आहेत. धूम्रपान, मद्यपान, जंक फूडचे सेवन आणि स्थूलतेच्या समस्येमुळे ही स्थिती आणखी गंभीर बनत आहे.

या बदलत्या ट्रेंडवर प्रोजेनेसिस फर्टिलिटी सेंटरचे वरिष्ठ वंध्यत्व निवारण तज्ज्ञ डॉ. नरहरी मळगांवकर म्हणतात, ‘‘आजच्या काळात वंध्यत्व ही केवळ वैद्यकीय समस्या न राहता, ती सामाजिक आणि मानसिक बाब बनली आहे. आमच्या क्लिनिकमध्ये येणाऱ्या १० पैकी सात जोडप्यांमध्ये वंध्यत्वामागे थेट जीवनशैलीशी संबंधित कारणे दिसून येतात.’’

त्यांच्या मते, ‘‘वंध्यत्व टाळण्यासाठी केवळ वैद्यकीय उपचार पुरेसे नाहीत. त्यासोबतच समतोल आहार, नियमित व्यायाम, पुरेशी झोप आणि तणावमुक्त राहण्याचा प्रयत्नही तेवढाच महत्त्वाचा आहे.’’