नवी दिल्ली/कोलंबो : भारतातून आयात केलेल्या डोळ्यांच्या औषधाच्या वापरामुळे सुमारे ३५ रुग्णांच्या डोळ्यात संसर्ग झाल्याची तक्रार अलिकडेच श्रीलंकेने केली आहे. या तक्रारीनंतर भारतात तयार झालेल्या औषधाची तपासणी सुरू करण्यात आली आहे.

केंद्रीय औषध मानक नियंत्रण संघटना (सीडीएससीओ) च्या सूत्रानुसार, श्रीलंकेकडून तक्रार आल्यानंतर गुजरातमधील औषध कंपनीची तपासणी केली जात आहे. मिथाईल प्रेडनिसोलोन आय ड्रॉपचा वापर केल्यानंतर रुग्णांच्या डोळ्यात संसर्ग वाढल्याचे तक्रारीत म्हटले आहे.

याच वर्षी मार्च महिन्यात आयड्रॉपचे दोन मोठे खेप श्रीलंकेला निर्यात करण्यात आले होते. मात्र एप्रिल महिन्यांत तेथील तीन मोठ्या रुग्णालयात ३० ते ३५ जणांच्या डोळ्यात संसर्ग झाल्याची तक्रार मिळाली. यानंतर श्रीलंका सरकारने या औषधावर बंदी घातली या तक्रारीची दखल घेत गुजरातच्या कंपनीने श्रीलंकेला पाठवलेले औषधे परत मागवले आहेत.

याप्रकरणी श्रीलंका सरकारने पत्र लिहून भारताला या प्रकरणाची निष्पक्ष चौकशी करण्याची मागणी केली. काही दिवसांपूर्वीच केंद्रीय आरोग्य मंत्री डॉ. मनसुख मंडाविया यांनी औषध उद्योगात गुणवत्तेत तडजोड केल्यास देशासाठी ती बाब चांगली राहणार नाही व ते सहन केले जाणार नाही, असा इशारा दिला होता.