Benefits of Vakrasana : रोजचे धावपळीचे जीवन, सतत लॅपटॉपसमोर बसून काम करणे, बिघडलेली जीवनशैली आणि व्यायामाचा अभाव इत्यादी कारणांमुळे आरोग्याच्या समस्या निर्माण होत आहेत. सतत बसून काम केल्यामुळे पाठदुखी, कंबरदुखी इत्यादी अनेक समस्या निर्माण होत आहेत. मग, या समस्या दूर करण्यासाठी विविध उपाय केले जातात.

परंतु, अशा परिस्थितीमध्ये तुम्ही योगाची मदत घेऊ शकता. योगामध्ये विविध प्रकारच्या आसनांचा समावेश होतो. या आसनांपैकीच एक असलेले वक्रासन आपल्या आरोग्यासाठी अतिशय फायदेशीर आहे. लवचिक योगासनांपैकी एक असलेले हे योगासन पाठीसाठी अतिशय उपयुक्त आहे. या वक्रासनाला 'ट्विस्टेड पोझ' असे म्हटले जाते. आज आपण वक्रासन करण्याची पद्धत आणि त्याचे आरोग्यदायी फायदे जाणून घेणार आहोत.

वक्रासन करण्याची योग्य पद्धत खालीलप्रमाणे :

• वक्रासन करण्यासाठी सर्वात आधी योगा मॅटवर दोन्ही पाय पसरून बसा.

• दोन्ही पायांमध्ये जास्त अंतर ठेवू नका.

• आता तुमचा डावा पाय गुडघ्यात वाकवून तो उचलून उजव्या गुडघ्याजवळ ठेवा.

• या स्थितीमध्ये तुमच्या पाठीचा कणा ताठ ठेवा आणि श्वास सोडताना कंबर डाव्या बाजूला वळवा.

• आता तुमच्या हाताच्या कोपराचा वापर करून दाब देऊन डाव्या पायाचा गुडघा तुमच्या दिशेने खेचा, जेणेकरून पोटावर दाब पडला पाहिजे.

• या स्थितीमध्ये तुम्हाला शरीरात ताण जाणवेल.

• आता श्वास सोडा आणि सामान्य स्थितीमध्ये परत या.

• आता दुसऱ्या पायाने हे योगासन पुन्हा करा.

वक्रासनाचे आरोग्यदायी फायदे :

• नियमितपणे वक्रासनाचा सराव केल्याने शरीराचा लवचिकपणा वाढण्यास मदत होते.

• पोटावरील चरबी कमी करण्यासाठी हे योगासन अतिशय उपयुक्त आहे.

• मधुमेह असलेल्या व्यक्तींनी या योगासनाचा नियमितपणे सराव करणे फायदेशीर ठरते.

• या योगासनाचा नियमितपणे सराव केल्याने वजन कमी करण्यास मदत होते.

• वक्रासनाचा दररोज सराव केल्याने पाठीचा कणा लवचिक बनतो. ज्यामुळे, पाठदुखी आणि कंबरदुखीची समस्या दूर होते.

• रोजच्या कामाचा ताण-तणाव दूर करण्यासाठी वक्रासन फायदेशीर आहे.

• पचनसंस्था सुरळीत करण्यासाठी या योगासनाचा नियमित सराव करा.

डिस्क्लेमर : सदर लेख फक्त सामान्य माहितीसाठी आहे. सकाळ माध्यम समूह अशा कोणत्याही गोष्टींची पुष्टी करत नाही. अधिक तपशीलांसाठी तुम्ही तज्ज्ञांचे मार्गदर्शन घेऊ शकता.