पुणे : पेरू एक आंबट-गोड फळ असून ते आतून पांढरे अथवा लालसर असते. अनेकांना पेरू खायला आवडतो. पेरू फळाची चव आणि आरोग्यदायी फायदे सर्वसामान्यपणे सर्वांना माहीत आहेत. पण खूप कमी लोकांना याच्या पानांचे आरोग्यदायी फायदे माहित आहेत. पेरूच्या पानांमध्ये भरपूर औषधी घटक असतात, जे तुमचे आरोग्य उत्तम राखण्याचे काम करतात. पेरूसोबतच त्याच्या पानाचे देखील आरोग्यासाठी खूप फायदे आहेत.

एनसीबीआय (National Center for Biotechnology Information) च्या मते, पेरूची पाने नैसर्गिक औषध म्हणून काम करतात. ज्यामुळे शरीर निरोगी राहण्यास मदत होते. पेरूच्या पानांमध्ये अँटिऑक्सिडेंट, अँटीबॅक्टीरियल आणि अँटी-इंफ्लेमेटरी गुणधर्म असतात. यासोबतच यामध्ये पॉलिफेनॉल, कॅरोटीनॉइड्स, फ्लेव्होनॉइड्स आणि टॅनिन ही रसायने आढळतात. जे विविध रोगांवर उपचार करण्यासाठी अत्यंत प्रभावी ठरतात.

तज्ज्ञांच्या मते, पेरूच्या फळाबरोबरच त्याच्या बिया, साल आणि पाने हे सर्व गुणधर्मांनी भरलेले आहेत. जगभरात पेरूच्या पानांचा रस पारंपारिक औषधात वापरतात. जपानमधील लोक हर्बल टी बनवण्यासाठी पेरूच्या पानांचा वापर करतात. चला जाणून घेऊया पेरूचे आरोग्यासाठी फायदे.

मधुमेह नियंत्रण करते

नॅशनल लायब्ररी ऑफ मेडिसिन नुसार, पेरूच्या पानांमध्ये मधुमेह विरोधी गुणधर्म असतात. यामध्ये असलेले फिनोलिक कंपाऊंड शरीरात तयार होणारी अतिरिक्त साखर नियंत्रित करण्याचे काम करते.

वजन कमी करते

पेरूच्या पानांमध्ये अनेक बायोएक्टिव्ह कंपाऊंड असतात, जे तुमच्या शरीरात कार्बोहायड्रेट्स रोखून ठेवण्याचे काम करतात. तसेच, ते शरीरातील साखर आणि कॅलरीजचे प्रमाण कमी करतात. ज्यामुळे वजन कमी होण्यास मदत होते.

बॅड कोलेस्ट्रॉल कमी करतात

पेरूची पाने शरीरातील हायपरग्लाइसेमिया म्हणजेच साखरेचे प्रमाण कमी करण्यास देखील मदत करतात. जे बॅड कोलेस्ट्रॉल कमी करतात. याशिवाय, पेरूच्या पानांमध्ये हायपोलिपिडेमिक गुणधर्म देखील असतात. ज्यामुळे शरीरातील चरबी कमी होते.

डाइरीयावर उपयोगी

पेरूच्या पाने डायरीया (अतिसार) कमी करणारे गुणधर्म असतात. पेरूच्या पानांमध्ये असलेले अँटी-हेल्मिंथिक गुणधर्म पोटाशी संबंधित सर्व समस्या दूर करतात. तसेच, हिमोग्लोबिन वाढवण्यास मदत करतात.

शुक्राणूंची संख्या वाढते

पेरूच्या पानांच्या मदतीने शुक्राणूंची संख्या वाढवली जाऊ शकते. प्रजनन क्षमता वाढविण्यास पेरूची पाने गुणकारी आहेत. या पानांच्या अँटिऑक्सिडंट गुणधर्मांचा शुक्राणूंच्या विषारीपणावर फायदेशीर प्रभाव पडतो. ज्यामुळे पुरुषांची प्रजनन क्षमता सुधारण्यास मदत होते.

कसा करावा पेरूच्या पानांचा चहा

चार मोठी ताजी पेरूची पाने स्वच्छ धुवून घ्या. कढईत एक कप पाणी गरम करून त्यात पेरूची पाने घाला. पाच मिनिटे उकळू द्या. आता पाने गाळून पाण्यात अर्धा लिंबू पिळून घ्या. चवीनुसार थोडे मध घाला. तयार आहे तुमचा चहा.