Heat Wave : ‘वेस्टर्न डिस्टर्बन्स’ चा प्रभाव कमी झाल्यामुळे आता विदर्भात अपेक्षेप्रमाणे उन्हाचा तडाखा वाढणार आहे. मंगळवारपासून तापमान वाढून उन्हाचे तीव्र चटके जाणवणार आहेत. तसे संकेत प्रादेशिक हवामान विभागातर्फे देण्यात आले आहे.

शहरात सोमवारी सकाळी ढगाळ वातावरण होते. मात्र दुपारनंतर सूर्य तापून ऊन वाढले. त्यामुळे नागपूरसह विदर्भातील कमाल तापमानात लक्षणीय वाढ झाली. पावसामुळे रविवारी ३७.४ अंशांपर्यंत घसरलेला पारा सोमवारी २.७ अंशांनी चढून ४०.१ अंशांवर गेला.

अकोला सर्वाधिक हॉट

विदर्भात सर्वाधिक ४२.३ अंश सेल्सिअसची नोंद अकोला येथे करण्यात आली. गोंदियाचा अपवाद वगळता विदर्भातील सर्वच जिल्ह्यांचा पारा चाळीशीवर गेला.

दिवसभर घामाच्या धारा

सूर्य तापू लागल्याने उन्हासोबतच उकाडा वाढला आहे. दिवसभर शरीरातून घामाच्या धारा वाहिल्या. शिवाय गर्मीमुळे चिडचिडेपणाही वाढला आहे. विक्रमी व कडक उन्हासाठी प्रसिद्ध असलेला मे महिना चोवीस तासांवर येऊन ठेपल्यामुळे, या आठवड्यात सूर्यनारायण उग्र रूप धारण करण्याची शक्यता आहे.

सावधगिरी बाळगण्याची गरज

तापमानवाढ झाल्यास उष्माघाताचे बळी वाढण्याची दाट शक्यता असते. त्यामुळे नागरिकांनी विशेषतः लहान मुले व ज्येष्ठ नागरिकांनी आवश्यक काळजी घेण्याची गरज आहे. कडक उन्हामध्ये दुपारच्या वेळी शक्यतो घराबाहेर पडू नये, असा डॉक्टरांचा सल्ला आहे.

विदर्भातील तापमान

शहर तापमान

नागपूर ४०.१

वर्धा ४१.०

अकोला ४२.३

बुलडाणा ४०.४

यवतमाळ ४१.२

गोंदिया ३८.२

ब्रह्मपुरी ४२.०

चंद्रपूर ४१.८

गडचिरोली ४०.२