Health Care : रोजचे धावपळीचे जीवन, बिघडलेला आहार, व्यायामाचा अभाव आणि चुकीच्या सवयींमुळे आरोग्याच्या समस्या दिवसेंदिवस वाढताना दिसत आहेत. त्यात सोशल मीडियाचा वाढलेला वापर, यामुळे रात्रीचे होणारे जागरण इत्यादी कारणांमुळे, शारिरीक आरोग्यासोबतच आपल्या मानसिक आरोग्यावर देखील परिणाम होताना दिसत आहे.

रात्रीचे जागरण केल्याने किंवा चुकीच्या पद्धतीने आहार घेतल्याने आजकाल झोप न येण्याची समस्या मोठ्या प्रमाणात वाढली आहे. त्यामुळे, थकवा येणे, डोळ्यांना सूज येणे, अशक्तपणा येणे आणि निद्रानाशाची समस्या मोठ्या प्रमाणात वाढली आहे. मग, ही झोपेची समस्या कमी करण्यासाठी अनेक उपाय केले जातात. मात्र, तरी ही म्हणावा तसा फरक पडत नाही.

अनेकदा असे होते की, चुकीच्या आहारामुळे देखील झोप न येण्याची समस्या उद्भवू शकते. त्यामुळे, हे पदार्थ संध्याकाळी ५-६ नंतर खाणे टाळायला हवेत. कोणते आहेत हे पदार्थ? जे तुम्ही संध्याकाळ झाल्यानंतर खाणे टाळायला हवे. चला तर मग जाणून घेऊयात या पदार्थांबदद्ल.

कॉफीचे सेवन करू नका

आपल्यातील अनेक जणांना रात्री झोपण्यापूर्वी कॉफी प्यायला आवडते. मात्र, रात्री झोपण्यापूर्वी कॉफीचे सेवन केल्याने झोप न येण्याची समस्या निर्माण होते. खरे तर कॉफीमध्ये असलेले कॅफिन आपल्या शरीरातील सतर्कता वाढवते. त्यामुळे, आपला मूड फ्रेश राहतो आणि लवकर झोप येत नाही.

नॅशनल इन्स्टिट्यूट ऑफ हेल्थच्या मते जेव्हा आपण कॉफी पितो, तेव्हा त्या कॉफीमधील उत्तेजक प्रभाव हा ३-५ तास टिकतो आणि झोप येत नाही. त्यामुळे, संध्याकाळी ६ नंतर शक्यतो कोणत्याही प्रकारच्या कॉफीचे सेवन करणे टाळा.

लिंबूवर्गीय फळांचे सेवन करणे टाळा

व्हिटॅमिन सी ने समृद्ध असलेल्या फळांचा लिंबूवर्गीय फळांमध्ये समावेश आढळून येतो. या फळांमध्ये लिंबू, संत्रा आणि टोमॅटो इत्यादी फळांचा समावेश असतो. जेव्हा संध्याकाळी ६ नंतर किंवा रात्री झोपण्यापूर्वी आपण ही लिंबूवर्गीय रसदार फळे खातो, तेव्हा त्याचा आपल्या झोपेवर नकारात्मक परिणाम होतो.

यामध्ये असलेले टायरामाईन हे अमिनो अ‍ॅसिड आपल्या शरीराला सक्रिय बनवते. त्यामुळे, झोप न येण्याची समस्या वाढते. शिवाय, झोपण्यापूर्वी आंबट-गोड फळांचे सेवन केल्याने शरीरात मोठ्या प्रमाणात ॲसिड तयार होते. त्यामुळे, ॲसिडिटीची समस्या आणि जळजळ होते.