विद्यार्थी- पालकांचा जीव मुठीत
पिंपरी-चिंचवडः शाळा-महाविद्यालय भरताना आणि सुटताना परिसरात होणारी तुडुंब गर्दी,वाहतूक व्यवस्थेचा आणि शिस्तीचा बोजवारा यांमुळे विद्यार्थी व पालकांचा जीव टांगणीला लागतो. उदासीन पोलीस व शाळा प्रशासन पहाता मोठा अपघात होण्याची हे वाट पहात आहेत का, असे उद्वेगाने म्हणावे लागत आहे. म्हाळसाकांत विद्यालय परिसरातील चित्र यासाठी पुरेसे बोलके उदाहरण आहे. कमी अधिक फरकाने सर्वत्र अशीच परिस्थिती आहे. रस्त्याच्या कडेला दुतर्फा होणारे पार्किंग वाहतुकीस अडथळा निर्माण करीत आहे. त्यातही भरधाव व कर्णकर्कश आवाज करीत जाणारी वाहने रस्ता ओलांडणाऱ्या विद्यार्थी पालकांच्या मनात भीती निर्माण करतात. तसेच अपघाताला निमंत्रण यातून मिळत आहे. विद्यार्थ्यानी भरगच्च रिक्षा, दुचाकीवर चार-चार विद्यार्थी घेऊन जाणारे पालक, हे धोकादायक असतानाही नेहमी दिसणारे चित्र. शाळा परिसरात असणारे ही परिस्थिती नियंत्रित करण्यासाठी ना शाळा प्रशासनाचे, ना वाहतूक पोलिसांचे प्रयत्न. आकुर्डीतील म्हाळसाकांत विद्यालय परिसरात पदपथ टपऱ्यानी व्यापले आहेत. तसेच शेजारीच केलेली पार्किंगमुळे पदपथावरून चालताही येत नाही.येथे रस्ता ओलांडून जाणे जिकिरीचे असते. एकूणच शाळा परिसरातील परिस्थिती अपघाताला निमंत्रण देणारी आहे आणि प्रशासन ढिम्म आहे.( संतोष हांडे : सकाळ छायाचित्रसेवा)