जळगाव : चाळीसगाव शहर पोलिस ठाण्यातील दोन पोलिस कर्मचाऱ्यांना चार हजारांची लाच घेताना जळगाव लाचलुचपत प्रतिबंधक विभागाच्या पथकाने मंगळवारी (ता. २८) सायंकाळी सातच्या सुमारास पकडले. अजिंक्य अहिरे व शैलेश पाटील अशी संशयित पोलिस कर्मचाऱ्यांची नावे आहेत.

तक्रारदार यांच्या मुलीचा छळ केल्याबाबत चाळीसगाव शहर पोलिस ठाण्यात गुन्हा दाखल आहे. या गुन्ह्यात मदत करण्यासह चार्जशीट पाठविण्यासाठी पाच हजारांची लाच पोलिस कर्मचाऱ्याने मागितली होती. मात्र, चार हजार रुपये देण्याचे ठरल्यानंतर एसीबीकडे तक्रार केल्यानंतर सापळा रचण्यात आला. शहरातील सिग्नल चौकात जळगाव एसीबीचे पोलिस उपअधीक्षक शशिकांत पाटील यांच्या मार्गदर्शनाखाली निरीक्षक संजोग बच्छाव, निरीक्षक एस. एन. जाधव व कर्मचाऱ्यांनी सापळा यशस्वी केला.