जळगाव : शहरातील शिवाजीनगर गेंदालाल मिल परिसरातून २८ वर्षीय तरुण दोन दिवसांपासून बेपत्ता झाला आहे. शहर पोलिस ठाण्यात या प्रकरणी हरविल्याची नोंद करण्यात आली आहे. विजय शंकर लोखंडे (वय २८, रा. गेंदालाल मिल) असे बेपत्ता तरुणाचे नाव आहे.

विजय लोखंडे हा आपल्या कुटुंबीयांसह गेंदालाल मिल परिसरात वास्तव्याला आहे. शनिवारी (ता. २५) रोजी सकाळी ११ वाजता विजय हा घरात कुणाला काहीही न सांगता बेपत्ता झाला. सायंकाळी घरी न आल्याने त्याच्या आईसह कुटुंबीयांनी परिसरात नातेवाईक व मित्र मंडळी यांच्याकडे तपास केला असता तो, कुठेही आढळून आला नाही. विजयची आई सुमन लोखंडे यांनी सोमवारी (ता. २७) रोजी सायंकाळी साडेसात वाजता शहर पोलिस ठाण्यात धाव घेऊन खबर दिली. त्यांच्या खबरीवरून शहर पोलिस ठाण्यात हरविल्याची नोंद करण्यात आली आहे. पुढील तपास सहाय्यक फौजदार गौतम केदार करीत आहे.