जळगाव : जिल्ह्यात रविवारी (ता. १७) रात्रीपासून पावसाचा जोर पुन्हा वाढला आहे. यामुळे गिरणा धरण शंभर टक्के भरले आहे. तर हतनूर (ता. भुसावळ) धरणातही प्रचंड पाणीसाठा झाल्याने धरणाचे ४१ दरवाजे पूर्णक्षमतेने उघडले आहेत. तापी काठच्या नागरिकांना सतर्कतेचा इशारा देण्यात आला आहे. तापी नदीला पूर आलेला आहे. (Latest Marathi News)

सततच्या पावसामुळे हतनूर धरणाचे ४१ दरवाज्यांपैकी ३६ दरवाजे पूर्ण उंचीने उघडलेले आहेत. तापी नदीपात्रामध्ये सद्य:स्थितीत एक लाख क्यूसेस पाणी विसर्गातून सोडण्यात येत आहे. सखल भागात राहणाऱ्या नागरिकांनी तसेच नदी काठच्या नागरिकांनी तातडीने सुरक्षित स्थळी स्थलांतर करावे. नाले, ओढे काठच्या नागरिकांनी दक्ष रहावे. नदीच्या पाणी पातळीत वाढ होत असल्यास नदीपात्रापासून दूर जावे. पुराचे पाणी पुलावरून वाहत असल्यास पूल ओलांडू नये. पूर पाहण्यासाठी गर्दी करू नये व सेल्फी काढण्याचा मोह टाळावा, सूचना देण्यात आल्या आहेत.