एरंडोल : नगरपालिकेचे प्रशासक तथा मुख्याधिकारी विकास नवाळे यांनी पालिकेतर्फे सुरू केलेल्या अंजनी नदीपात्राच्या स्वच्छता उपक्रमात शहरातील विविध संघटनाच्या पदाधिकाऱ्यांनी तसेच बचत गटाच्या सदस्यांनी सहभाग घेतला. पालिकेतर्फे दोन दिवसांत नदीपात्राची जलदगतीने स्वच्छता करण्यात येत असून, स्वत: मुख्याधिकारी विकास नवाळे, आरोग्य निरीक्षक अनिल महाजन, आनंद दाभाडे यांच्यासह पालिका कर्मचारी उपस्थित राहून सफाई कर्मचाऱ्यांना मार्गदर्शन करीत आहेत.

मुख्याधिकारी नवाळे यांनी पालिकेतर्फे नदीपात्राची स्वच्छता करण्याचा उपक्रम सुरू केला असून, अनेक सामाजिक संघटनांचे पदाधिकारी यामध्ये सहभागी होत आहेत. नदीपात्राची स्वच्छता केल्यानंतर पात्रालगत वृक्षारोपण केले जात असल्यामुळे परिसराच्या सौंदर्यात भर पडत आहे. पालिकेने केलेल्या आवाहनास बजरंगदल, शिवप्रतिष्ठान हिंदुस्तान, भाजप, विवेकानंद केंद्र, योगेश्वर नागरी सहकारी पतसंस्थेच्या पदाधिकाऱ्यांनी या उपक्रमात सहभागी होऊन नदीपात्रातील सुमारे तीन ट्रॉली प्लास्टिक कचरा व घाण जमा करून त्याची विल्हेवाट लावली.

माजी नगरसेवक डॉ. नरेंद्र पाटील यांचे मार्गदर्शनाखाली बजरंग दलाचे अखंड संयोजक भरत महाजन, भाजपचे तालुका सरचिटणीस अमोल जाधव, माजी उपनगराध्यक्ष अशोक चौधरी, विश्व हिंदू परिषदेचे भूषण चौधरी, विवेकानंद केंद्राचे प्रा. जी. आर. महाजन, भाजप युवा मोर्चाचे सुनील चौधरी, प्रकाश पाटील, शिवप्रतिष्ठान हिंदुस्तानचे गणेश पाटील, सागर मराठे, विकी ढाकणे, लोकेश महाले, हेमंत सोनार, प्रशांत माळी, गौरव महाले, राहुल राजपूत, यशवंत वाघ, शुभम मोराणकर यांच्यासह पदाधिकाऱ्यांनी सहभाग घेतला.

तसेच अनेक महिला मंडळाच्या पदाधिकाऱ्यांनी वृक्षारोपण करून सामाजिक बांधिलकी जपली. पालिकेने माझी वसुंधरा बचाव उपक्रमात स्वच्छता व वृक्षारोपण यावर भर दिला असून, नागरिकांचा प्रतिसाद देखील मिळत आहे. शहरातील राजकीय, सामाजिक व शैक्षणिक संस्थांच्या पदाधिकाऱ्यांनी तसेच युवकांनी स्वच्छता उपक्रमात सहभागी व्हावे, असे आवाहन मुख्याधिकारी नवाळे यांनी केले आहे.